Al cumplise’l 75 aniversariu de la lliberación del campu de concentración de Mauthausen esti sábadu, a les doce del mediudía, va llevase a cau una ufrienda floral nel monolitu de la Sienda d’El Cervigón, en Xixón, dedicáu a les víctimes asturianes del nazismu. Una hora más tarde, a la una, a pocos metros de distancia va facese un homenaxe a la escritora y llibrepensadora Rosario de Acuña (1850-1923), delantre de la que foi la so casa. Dambos actos tán organizaos pol Atenéo Obreru de Xixón, la Sociedá Cultural Xixonesa, la Logia Rosario Acuña (GOdF), la Federación Asturiana Memoria y República (FAMY) y la Tertulia Feminista Les Comadres.
Nel primer actu van intervenir Ovidio Álvarez Rozada (directivu de la Cultural Xixonesa), Rafael Velasco (presidente de FAMYR) y Pedro Timón (sociu del Atenéu Obreru y autor del documental memorialista Víctor Cueto. No 3438); Rosa Rodríguez y Manuel Martínez, integrantes del Grupu Eleuterio Quintanilla, van lleer los nomes de les 31 persones xixoneses deportaes a campos de concentración. Nel actu de recuerdu a Rosario de Acuña van tomar la pallabra la ex alcaldesa Paz Fernández Felgueroso (en representación de Les Comadres), Eva Fernández (vicepresidenta de la Cultural Xixonesa) y la ex conceyala Ana Castaño (socia del Atenéu Obreru).
Van acudir a los dos homenaxes dellos portavoces y conceyales de los grupos políticos del Ayuntamientu de Xixón.
