La conseyera de Cultura, Política Llingüística y Turismu del Principáu, Berta Piñán, anunció esti sábadu en Cangas del Narcea, nun actu de la Selmana de les Lletres canguesa, que la Selmana de les Lletres Asturianes de 2022 va tar dedicada al músicu y dibuxante de cómic Ígor Medio. Esi añu va cumplise mediu sieglu del nacimientu del creador xixonés, muertu nun accidente de tráficu que sufrió la furgoneta na que viaxaba la banda Felpeyu nel País Vascu en xunu de 2006, un sucesu nel que tamién perdió la vida’l músicu Carlos Redondo.
Esta va ser la primer vez que la Selmana de les Lletres Asturianes tea dedicada a un autor de cómic, y amás va ser la primer vez qu’una persona nacida na década de los 70 reciba esti homenaxe. Ígor Medio Tuya (1972-2006) crióse nel barriu xixonés del Natahoyo y estudió Belles Artes en Salamanca, onde afondó la so afición a la música como instrumentista de guitarra, mandolina y bouzouki. Foi ún de los creadores de Felpeyu, una de les bandes asturianes de folk con más proyección internacional. La so bra como dibuxante publicóse en revistes como El Llapiceru o El Wendigo.
Per otra parte, sigue en marcha na plataforma Verkami’l crowdfunding pa editar la obra completa, con material inéditu tamién, de La familia Castañón, la tira diaria d’humor gráficu qu’Ígor Medio publicaba cada branu, ente 1997 y 2005, nel periódicu La Nueva España. Va ser un llibru de 320 páxines y les aportaciones económiques van dende los 25 a los 100 euros. Si lleguen a 7.000 euros, los promotores van facer entrega d’un centenar y mediu d’exemplares a la Conseyería de Cultura, Política Llingüística y Turismu pa distribuilos ente les biblioteques públiques d’Asturies, los servicios de normalización llingüística de los conceyos y clubes de llectura.
