La sorrisa lorquiana de Xosé Bolado

L'escritor, militante d'izquierdes y académicu de la Llingua Asturiana morrió esti xueves en Madrid

Recomendados

Paco Álvarez
Paco Álvarez
Periodista, escritor y traductor lliterariu d'italianu. Ye autor de les noveles "Lluvia d'agostu" (Hoja de Lata, 2016) y "Los xardinos de la lluna" (Trabe, 2020), coles que ganó en dos ocasiones el Premiu Xosefa Xovellanos.

Los años noventa echaben a andar mirando de regüeyu hacia esi pasáu inmediatu qu’esfarrapaba mieos y esperanzas ensin facer distinciones ente unos y otres. Xosé Bolado yera’l presidente del Atenéu Obreru de Xixón, una institución que cola muerte del dictador Francisco Franco recuperara pasu ente pasu la dignidá y la solemnidá que-y arrampuñara’l réxime fascista. Xosé Bolado yera’l dignu y solemne herederu d’aquelles y aquellos ateneístes xixoneses que siempre caltuvieron prendida la llama del racionalismu y de la llibertá, mesmamente en tiempos gobernaos pola escuridá y pol escurantismu.

Yo yera un periodista de ventipocos años cuando entrevisté a Xosé Bolado por primer vez. Daquella vi nél solo la dignidá d’aquel cargu que representaba y que m’impresionaba, anque tres d’aquello había un militante del Movimientu Comunista d’Asturies y ún de los primeros militantes d’esta llingua que garró y protexó tolo que simbolizaben aquelles pancartes primixenies qu’esixién dignidá pal asturianu. A Xosé Bolado entrevistélu, con tola mio inorancia, aquella mañana nel primer pisu del númberu 7 de la xixonesa cai Cuadonga. Y a pesar de la mio inorancia quedáronme grabaes d’aquello dos circunstancies: la serenidá de les sos pallabres y la sorrisa horizontal y inquebrantable que gastaba Xosé Bolado. Entrevistélu en castellanu y él respondió a les entrugues en castellanu…

Meses dempués descubrí que Xosé Bolado, nomáu intelectual en munchos campos, yera tamién falante y escritor en llingua asturiana. Y les poques veces que coincidimos dempués falamos n’asturianu y mirámonos como diciendo: “Cuántos matices perdímonos por nun falar d’entrada esta llingua”. Nun sé mui bien por qué, pero dende aquella mañana cualesquier d’un añu cualesquier d’entamos de los años noventa en que’l mio redactor xefe mandóme entrevistalu nun fui quien a imaxinar a Xosé Bolado d’una forma distinta de la que lu sigo imaxinando anguaño: con una sorrisa poética, rebelde, lorquiana. Cuido que la llibertá, la poética y la rebeldía son tres atributos que merez, tanto o más que naide nesta tierra asturiana, Xosé Bolado García (1946-2021), profesor, académicu de la Llingua, poeta, mlitante de la llibertá, que morrió esti xueves. Quédanos la so poesía. Quién nesta circunstancia cotidiana / pue negase a da-y madre a la voz / ya nun testar en llinies llargues ya clares / toles pallabres nes que sintió la vida

- Publicidad -spot_img

Actualidad

Dejar respuesta

Please enter your comment!
Please enter your name here