El 25 de mayu o l’alcordanza de la otra Asturies

La rebelión asturiana de mayu de 1808 foi una auténtica revolución.

Recomendados

Faustino Zapico
Faustino Zapico
Faustino Zapico. Historiador y profesor. Sindicalista a tiempu parcial y republicanu asturianista a tiempu completu.

Cúmplese un añu más esti 25 de mayu l’aniversariu d’ún de los acontecimientos más importantes de la historia recién asturiana y esta vez paez que la conmemoración nun va ser namás cosa de colectivos de la sociedá civil, sinón que tamién dende les instituciones autonómiques empiecen a ser conscientes de la necesidá de tener presente un aniversariu que marca l’aniciu de la dómina contemporánea nel nuestru país.

Bono ye facer un repás de los acontecimientos: El 9 de mayu de 1808 lleguen a Asturies les primeres noticies de la masacre del 2 de mayu en Madrid, onde les tropes napoleóniques reprimen xabazmente la sublevación del pueblu de la capital. Esi día entama un motín popular n’Uviéu encabezáu por muyeres y estudiantes que lleva a la Xunta Xeneral, que por feliz casualidá histórica taba en períodu de sesiones) a celebrar un conceyu ampliáu a otros sectores sociales (cabildu catedraliciu, Universidá y gremios artesanos) que decidió nun reconocer a otru rei qu’a Fernando VII y entamar los preparativos bélicos. El 13 de mayu la mayoría de los diputaos, que tomaren la decisión de rebelase baxo presión popular, reculen y revoquen los alcuerdos. Una minoría de diputaos, encabezada pol que taba acabante de ser elexíu Procurador Xeneral, Álvaro Flórez Estrada, entama la conspiración. La nueche del 24 al 25 de mayu los rebalbos, apoyaos polos militares y obreros de la fábrica d’armes, tomen la Rial Audiencia, representante del gobiernu central, y obliguen al so presidente a convocar una sesión estraordinaria de la Xunta, convocando namás a los quince diputaos partidarios de la guerra. A un tiempu, cásique 3.000 campesinos armaos provinientes de los conceyos vecinos tomen la capital. La madrugada del 25 de mayu, la Xunta Xeneral proclamábase soberana, declarába-y la guerra a Francia, ponía embaxadores nel Reinu Uníu pa solicitar ayuda militar y entamaba la formación del Exércitu Defensivu Asturianu. Inventaben, de pasu, l’actual bandera asturiana.

“Cásique 3.000 campesinos armaos provinientes de los conceyos vecinos tomen la capital”

Viéndolo en perspectiva, yera una empresa suicida. Qu’un paisucu que yera una provincia periférica de la monarquía española, económicamente atrasáu y que nun llegaba a los 400.000 habitantes declarara la guerra él solu al Imperiu Francés, que nesa primavera de 1808 tenía dominada a tola Europa continental dende Lisboa a Moscú nun ye precisamente una demostración de prudencia. Pero funcionó. La embaxada del vizconde de Matarrosa, José María Queipo de Llano, foi recibida en Londres como una bendición, y l’ayuda financiera y militar en forma de perres, armes y uniformes nun tardó en llegar. L’Exércitu Defensivu Asturianu, formáu pola Xunta Xeneral, nun foi quien a torgar les dos invasiones franceses d’Asturies y acabaría estrozáu al otru añu na batalla d’Espinosa de los Monteros frente a esa estrapalladora de carne que yera l’exércitu napoleónicu, pero’l glayíu de rebelión que s’alzó en mayu de 1808 valió d’exemplu pa que nel branu d’esi mesmu añu la península entera tuviera llevantada n’armes, con más gana qu’habilidá, escontra’l francés.

La rebelión asturiana de mayu de 1808 foi una auténtica revolución. Yelo non solo porque lo dixeren los sos protagonistes, qu’asina la llamaron, sinón porque cola so actuación saltaba pelos aires esi mesmu Vieyu Réxime que la Xunta, en rialidá, quería encontar. Al adoptar esi calter representativu acullá de les sos funciones, al asumir una soberanía n’ausencia del lexítimu detentador de la mesma, l’infame Fernando VII; al proclamar que la soberanía pertenecía al pueblu, al desafiar y declarar la guerra a un poder francés ilexítimu pero llegal, la Xunta Xeneral, reconvertida en Xunta Suprema, facía entrar a Asturies na dómina contemporánea y amás pela puerta grande.

“La rebelión asturiana de mayu de 1808 foi una auténtica revolución”

A lo llargo del sieglu XIX hai una memoria colectiva n’Asturies del papel xugáu pola Xunta na guerra escontra’l francés. Forma parte de la identidá política democrática y el republicanismu asturianu cultívala. De fechu, na propuesta de Constitución pal Estáu Asturianu de 1883 qu’ellabora’l Partíu Republicanu Democráticu Federal el nome del conxuntu de les cámares del lexislativu ye’l de Xunta Suprema, remitiéndose asina a la lexitimidá de 1808. Nun yera raro, yá que’l propiu Pi y Margall vía nel movimientu del 25 de mayu la confirmación de la so tesis d’un federalismu inconsciente ente los pueblos de la península, que los empobinada a recuperar la soberanía perdida cuando la patria grande taba amenazada pa depués refederase de forma voluntaria.

La memoria colectiva de la Xunta de 1808 foi esmuciendo adulces nel sieglu XX sigún el mapa políticu asturianu diba quedando apoderáu por corrientes más centralistes, cuando non abiertamente sucursalistes. Sicasí, na guerra civil les referencies a la xunta de 1808 como modelu a siguir y exemplu de dignidá y resistencia son constantes y comunes a tol ámbitu republicanu, incluyendo a la CNT y los comunistes. Asina, cuando acaba la llarga nueche del franquismu y entama la reforma política que llevó al estáu autonómicu, entraba dientro de la lóxica que’l 25 de mayu fuera’l señaláu como día de la flamante comunidá autónoma d’Asturies. Evidentemente, nun foi asina, yá que les dirixencies polítiques de los partíos qu’armaron l’autonomía optaron pola del 8 setiembre, fiesta relixosa dedicada a la Virxe de Cuadonga y que de nenguna manera podemos asociar a la batalla del mesmu nome, de la que nun conocemos la so fecha. Yera estraño ver a la esquierda parlamentaria (PSOE, PCE) acabar apostando por una fecha de clares connotaciones nacional-católiques, por mui popular que fuera, en cuenta de por un 25 de mayu que, por contra, podía tener elementos referenciales pa toles corrientes polítiques operantes nel país: pa la derecha reaccionaria yera l’exemplu d’alzamientu en defensa de la monarquía, la relixón y la patria; pa los lliberales de voladura del Vieyu Réxime y l’aniciu de les tresformaciones lliberales; pa la esquierda de rebelión de les mases, de proclamación de la soberanía popular y de protofederalismu. Pero nun foi asina. L’asturianismu quedó casi solu na defensa del 25M y la fecha cayó nun progresivu escaezu, sacante sectores mui concretos, que vieron un curtiu renacer con motivu del 200 aniversariu del mesmu. Abulta paradóxico ver cómo agora, nuna Asturies ca vez con menos referentes colectivos de los que sentise arguyosos, los mesmos que dende’l gobiernu apostaron pol 8 setiembre y por una visión d’Asturies non mui alloñada del provincialismu franquista redescubran el 25 de mayu como fecha d’identificación colectiva, como un posible puntu d’alcuentru en clave asturiana, onde la nuestra sociedá empiece a ser consciente del so pasáu colectivu acullá de cuatro tópicos masuñaos. Falta facía recordar qu’hubo otra Asturies posible, y sigue habiéndola. Más val tarde que nunca.

- Publicidad -spot_img

Actualidad

1 Comentario

  1. Lo importante nun ye la fecha, sinón el significáu que se-y dea. El 25 Mayu debiere ser festivu en toa Asturies, pero ensin sustituyir al 8 Setiembre. Ver l’8 Setiembre como una fiesta relixosa sedría como ver la bandera asturiana como un símbolu relixosu. Hai que ser lo suficientemente abiertos de mente como pa entender que les coses evolucionen y que l’orixe ye una cosa y la realidá y l’usu actual otra. ¿O ne Nadal nun aconceyamos cola familia, ponemos l’árbol y fasta’l Belén, entá siendo ateos? Lo qu’hai que criticar ye qu’el Gobiernu vaiga a Cuadonga esi día col Arzobispu, non qu’el Día en sí seya festivu o non. Claro que lu tien que ser.

Dejar respuesta

Please enter your comment!
Please enter your name here