La seición d’Educación de la Corriente Sindical d’Izquierda (CSI) fizo públicu un comunicáu nel qu’esixe a la Conseyería d’Educación que faiga cumplir la normativa en cuantes a la ufierta de Llingua Asturiana y Lliteratura y Gallego-Asturiano. La CSI recuerda qu’esa asignatura “tien un calter d’optatividá, polo que les escolines y escolinos han de decidir si estudien esti idioma o otres materies (Segunda Llingua Estranxera, Cultura Clásica, Informática…)”. Añade que “esta nun ye la situación na que tendría d’atopase esta materia, pero nun podemos dexar a un llau el marcu llegal nel que nos movemos”.
La Corriente Sindical d’Izquierda denuncia que “tamos empezando a conocer casos de centros qu’apuesten por nun ufiertar Llingua Asturiana al alumnáu de dalgunos niveles, plantegando escuses de toa triba: dende la falta de profesoráu hasta la imposibilidá horaria. Queremos recordar que tolos centros tienen la obligación de facilitar a les y los estudiantes la posibilidá de cursar la materia de Llingua Asturiana”. Camienta que dende la Conseyería “habríen de ponese en contautu con tolos centros educativos pa informalos de la situación (al traviés d’una circular oficial, por exemplu), plantegando depués les sanciones afayadices p’aquellos que decidan nun siguir el mandáu oficial”.
P’acabar, la CSI diz que l’aprobación de les especialidaes docentes de Llingua Asturiana y Gallego-Asturiano, “xunto a la declaración d’oficialidá d’estes llingües y el so estudiu de manera troncal, sedríen les soluciones adecuaes pa poner fin a esti tipu de discriminaciones y ameyorar la situación de docentes y estudiantes”.
