Tres denunciar la Corriente Sindical d’Izquierda y Podemos Asturies que la residencia de persones mayores de Sotiel.lo, nel conceyu d’Ayer, lleva funcionando cuasi un deceniu ensin llicencia d’apertura, la directora xerente del organismu autónomu Establecimientos Residenciales p’Ancianos (ERA), Ana Suárez, salió al pasu con “una rempuesta que, lloñe d’aclarar si esa llicencia esiste o non, intenta una vez más esviar l’atención, aludiendo a fases alministratives d’execución de la obra”, diz la sección sindical de la CSI nel ERA, que pide que “aporte, pol mediu que-y paeza oportunu, la llicencia reclamada y, en casu de nun esistir, como denunciamos públicamente, esiximos la so inmediata dimisión”.
El sindicatu insiste en que “la nuesa denuncia ye mui clara y directa: la residencia alcuéntrase n’actualidá desarrollando la so actividá de manera illegal”. Asinamesmo, la CSI informa de qu’anguaño “tamos solicitando información pa saber si, como sospechamos, hai más residencies del ERA na mesma situación” y alvierte de que “una vez que tengamos los datos vamos facilitalos en rueda de prensa”.
