Nunca condenaron el franquismu. Nin por acción nin por omisión. Nin el Partíu Popular nin la so antecesora Alianza Popular, fundada por Manuel Fraga Iribarne, un personaxe adoráu n’AP y nel PP. Ente otres ‘fazañes’, el qu’entós yera’l ministru Fraga aplaudió y xustificó delantre de la opinión pública española y internacional la decisión de Franco de fusilar en 1963 a Julián Grimáu, dirixente del PCE sentenciáu en conseyu de guerra tres ser deteníu y torturáu xabazmente.
Esi PP qu’agora condena hasta l’aburriciónl’indultu a independentistes catalanes nunca tuvo vagar nin valor nin decencia pa condenar el réxime franquista que llegó al poder xenerando un océanu de sangre col apoyu militar del réxime fascista de Benito Mussolini y del réxime nazi d’Adolf Hitler. El réxime que convirtió a España nel segundu país del mundu (per detrás de Camboya) con mayor númberu de seres humanos sepultaos en foses comunes. El réxime que provocó un descomanáu esiliu d’intelectuales, artistes, científiques, científicos… que nun teníen sitiu nesa España del gloriosu Alzamientu. El réxime que-yos robó les fíes y los fíos a muyeres que consideraba indignes. El réxime que dio carta blanca pa imponer el catecismu y el nacionalcatolicismu a hostia llimpia nos colexos. El réxime que consideraba que les muyeres habíen de ser tutelaes polos homes, que nun teníen siquiera’l derechu a abrir una cuenta bancaria propia. El réxime que persiguió al colectivu LGTBI. El réxime que reprimió l’usu de toles llingües quitante l’español…
El Partíu Popular, trufáu de dirixentes qu’habríen de tar en prisión por corrupción, un partíu fundáu sobre los restos del fascismu, pretende mirar perriba del hombru al independentismu catalán d’izquierdes, nel que militen personaxes como Oriol Junqueras, que lleva tres años en prisión, el partíu nel que militaron personaxes como Lluís Companys, al que la Gestapo deportó dende Francia pa que la España de Franco lu fusilara nel castiellu de Montjuïc.
