La banda avilesina de rock Dixebra ta rematando estos díes los cantares que van formar parte del so nuevu trabayu discográficu, que fai’l númberu 17 y lleva por títulu Ente la niebla. Los últimos arreglos tán faciéndolos nel pueblu de Chanos, en L.lena, d’onde ye orixinariu Primi Abella, guitarrista y compositor del grupu. Ellí montaron un pequeñu set de grabación onde tán acabando sobre too la parte vocal del discu, a cargu de Xune Elipe, cola grabación de les maquetes previes a la entrada nos estudios Tutu de Corvera, baxo la producción de Sergio Rodríguez, en seronda, pa sacar el discu a la venta a finales d’añu. Precisamente en socedíos, paisaxes y personaxes del pueblu de Chanos tán basaos dellos de los testos de les nueves composiciones.
Esta producción de Dixebra supón, en pallabres de la banda, “una obra conceptual mui especial, onde los cantares xiren alredor de la memoria histórica o colectiva de los asturianos y asturianes”. La idea ye tratar temáticamente la historia del pueblu asturianu del últimu sieglu, “dende la industrialización del país y el surdimientu d’una clas proletaria asturiana”. Les lletres percuerren asuntos como “la toma de conciencia política, les primeres lluches obreres, l’autoorganización, la emigración, la Revolución d’Ochobre, la guerra contra’l fascismu, la represión, l’exiliu, los fugaos, la fuelgona del 62, el paternalismu franquista, la transición, la reconversión industrial, les movilizaciones del naval, la llucha de les muyeres d’IKE, la mafia sindical, el desencantu o les movilizaciones actuales”.
Ente la niebla va presentase en formatu de llibru-cedé, con collaboraciones de periodistes, escritores, profesores, historiadores, ilustradores y dibuxantes, que coles sos creaciones reflexonen sobre’l pasáu, el presente y el futuru de la clas obrera asturiana. Porque, espliquen los miembros de Dixebra, “la evolución histórica de les clases populares y trabayadores d’esti país ye parte fundamental de la nuestra idiosincrasia como pueblu y una seña d’identidá con una potencia como poques”.
