La bandera colos seis colores del movimientu LGTBI puede vese dende esti mediudía nel balcón del Ayuntamientu de Xixón. La so presencia na fachada de la casa consistorial nestes feches cercanes al Día del Arguyu, que se conmemora cada añu’l 28 de xunu, respuende a un proposición presentada pol grupu municipal de Podemos-Equo Xixón nel últimu plenu y qu’aceptó l’equipu de gobiernu, formáu pol PSOE y Izquierda Xunida.
La iniciativa de la coalición morada y verde ellaboróse cola collaboración y la participación de los colectivos Xega, Disex Asturies y Transire Asturies. Nella pidíen la presencia de la bandera nel balcón del edificiu “como forma de visibilizar el compromisu de la ciudá cola defensa de los derechos humanos de les y los vecinos del colectivu LGTBI”.
Laura Hurlé, conceyala del grupu ultraderechista Vox, unvió esti mediudía una carta a l’alcaldesa, la socialista Ana González, na qu’esixe “la retirada, de forma inmediata y enantes de qu’acabe’l día de güei” d’esa bandera. Laura Tuero, portavoz de Podemos-Equo Xixón, nun tardó en retrucar asegurando que “Xixón ye una ciudá democrática, diversa y inclusiva na que la esclusión que pregona la ultraderecha nun puede tener sitiu. La presencia de la bandera LGTBI nel balcón del Ayuntamientu simboliza eso que tanto-yos molesta: la democracia, la diversidá y la inclusión”.
