La plataforma ciudadana Un Pulmón pal Solarón organiza pa esti martes, festividá local en Xixón, un vermú y una comida popular nesa zona verde. El colectivu convocante anuncia que dende les doce y media del mediudía y hasta les seis y media de la tarde “vamos tar n’El Solaron reivindicándolu como espaciu verde”
A lo llargo de seis hores va haber cuentacuentos infantiles y música, ente otres actividaes. Un Pulmón pal Solarón fai un llamamientu a la ciudadanía xixonesa pa que participe nesti actu que ye al empar lúdicu y reivindicativu: “Trai dalgo de comer y pasemos el día celebrando que volvemos a salir a la cai pa reclamar que los tarrenos nun se vendan”.
El Solarón, llamáu oficialmente Xardinos del Tren de la Llibertá, tien una superficie de cuasi 45.000 metros cuadraos, lo que lu convierte nuna de les zones verdes más amplies de la ciudá de Xixón. La plataforma Un Pulmón pal Solarón refuga’l proyectu de da-y usu urbanísticu a una parte d’esi espaciu.
