Aviones de papel contra aviones de guerra ente la mar y el cielu de Xixón

La CODOPA, el CMX y Acción en Rede Asturies entamaron nel muelle xixonés un actu pa pidir la desapaición definitiva del Festival Aereu

Recomendados

Paco Álvarez
Paco Álvarez
Periodista, escritor y traductor lliterariu d'italianu. Ye autor de les noveles "Lluvia d'agostu" (Hoja de Lata, 2016) y "Los xardinos de la lluna" (Trabe, 2020), coles que ganó en dos ocasiones el Premiu Xosefa Xovellanos.

La pallabra siempre foi la munición del movimientu pacifista pa denunciar les guerres, el comerciu y el tráficu d’armes, el militarismu y tolo qu’ello representa. Cola pallabra como munición, col bolígrafu y el foliu en blanco como materies primes y coles persones que caminaben a esa hora pel paséu del muelle de Xixón como mano d’obra cooperante desarrollóse esta tarde l’actu alternativu a la Folixa de la Paz convocada pola Coordinadora Asturiana d’Organizaciones Non Gubernamentales pal Desarrollu (CODOPA), el Conseyu de la Mocedá de Xixón (CMX) y Acción en Rede Asturies como actu contestatariu delantre del Desfile Aereu que tien llugar cada branu en Xixón.

La Folixa de la Paz, esti añu en que nun hai desfile d’aviones de guerra sobrevolando’l cielu de Xixón por mor de les midíes sociosanitaries, sobrevoló l’espaciu aereu ente la mar y el cielu en forma d’aviones de papel. Les entidaes convocantes montaron una mesa ente la plaza del Marqués y la cai de Claudio Alvargonzález na que repartíen fueyes y emprestaben bolígrafos pa escribir, en forma d’avión de papel, mensaxes manuscritos con acentu pacifista que diben a parar a un buzón especial. Los escritos recoyíos nesi buzón van ser entregaos estos díes nel Ayuntamientu, con destín al equipu de gobiernu del PSOE y IU, pa pidir la desapaición definitiva del Desfile Aereu, costosu económicamente, insostenible medioambientalmente y inxustificable dende’l prisma de los derechos humanos y de la cultura pa la paz.

Laura Tuero, portavoz de Podemos-Equo Xixón, y Javier Arjona, de Soldepaz-Pachakuti.

La periodista Lucía Nosti, portavoz de la convocatoria, señaló que “anque esti añu va haber Festival Aereu queremos recorda-y al Ayuntamiento que siguimos tando en contra de qu’haya aviones de guerra sobrevolando la costa de Xixón. La nuesa ye una rempuesta pacifista a esa actividá que ye propaganda del militarismu disfrazada d’acrobracies aérees”.

La conceyala portavoz de Podemos-Equo Xixón, Laura Tuero, acudió a la concentración y escribió ún de los mensajes pacifistes destinaos al equipu de gobiernu municipal. Turistes y xente de Xixón foron averándose al puestu de la Folixa de la Paz pa garabatiar, con diferentes acentos y llingües, mensaxes de paz ente la mar y el cielu de Xixón.

Actualidad

Dejar respuesta

Please enter your comment!
Please enter your name here