“Emburriando” ye un curtiu documental que xira alredor de La Güestia Roller Derby, el primer y únicu equipu qu’hai n’Asturies de roller derby, un deporte de contactu sobre patines que nació n’Estaos Xuníos. Cola intención de visibilizar el deporte femenín, la marca de ropa Puru Remangu produxo esta obra audiovisual que s’estrenó’l 9 de mayu en YouTube y redes sociales y qu’esti sábadu va proyectase a les 18h nel CSA L’Apiaderu -n’El Remediu, en Nava-, dientro d’una charra que van dar xugadores de La Güestia Roller Derby.
La Güestia Roller Derby. Foto: Aida Holgado.
Según el Diccionariu de l’Academia de la Llingua Asturiana, emburriar ye «facer fuercia [contra daqué o daquién pa movelu, pa valtalu]» o «ayudar [a daquién que nun s’atreve a llograr un oxetivu]», por eso Puru Remangu garró esti conceptu pa da-y forma a esti documental que fala sobre compañerismu, sororidá, autoorganización, feminismu, llucha y superación, amás d’amosar el compromisu de La Güestia Roller Derby cola cultura asturiana y col mundu rural.
Na creación de “Emburriando” participaron Puru Remangu cola idea y el guión, Feeling Movie cola realización audiovisual, Fruela 757 cola banda sonora orixinal, Aida Holgado coles semeyes y delles de les xugadores de La Güestia Roller Derby. Dende’l so estrenu, el curtiu documental tuvo cuasi 10.000 reproducciones ente les distintes redes sociales y la proyección del sábadu va ser un pasu más p’afondar na visibilización del deporte femenín.
