Podemos plantega una reforma estatutaria que reconoza que “Asturies nun ye menos que naide”

Na negociación del Estatutu'l partíu moráu va poner l'acentu na oficialidá, el blindaxe de derechos sociales, l'aumentu de competencies y la rexeneración democrática

Recomendados

Paco Álvarez
Paco Álvarez
Periodista, escritor y traductor lliterariu d'italianu. Ye autor de les noveles "Lluvia d'agostu" (Hoja de Lata, 2016) y "Los xardinos de la lluna" (Trabe, 2020), coles que ganó en dos ocasiones el Premiu Xosefa Xovellanos.

La oficialidá de “les dos llingües propies d’Asturies, asturianu y gallego-asturiano o eonaviego”, el “blindaxe de derechos sociales”, midíes empobinaes a “la rexeneración democrática” y “l’asunción progresiva de les competencies yá contemplaes nel actual Estatutu” son los cuatro pegollos nos que Podemos Asturies apoya la so posición respecto a la reforma estatutaria. El portavoz parlamentariu y secretariu xeneral asturianu, Daniel Ripa, señaló esti mediudía en Xixón que les propuestes que la so formación lleva a la negociación van encaminaes al reconocimientu de que “Asturies nun ye menos que naide”.

El partíu moráu presentó güei les propuestes en materia estatutaria nun actu celebráu nel Muséu del Ferrocarril y nel qu’amás de Daniel Ripa intervinieron Covadonga Tomé, Pablo Martínez Testa, Cristina Tuero y Enrique López. Esti últimu afirmó que “el procesu que comienza agora tien una carga histórica induldable. Vamos facer tolo posible por aprovechar esta oportunidá que se presenta”.

Covadonga Tomé diríxese al públicu asistente al actu. FOTO: David Aguilar Sánchez

Covadonga Tomé punxo l’acentu en que l’Estatutu ha d’ufrir “un blindaxe de los derechos sociales, que sufren un abandonu históricu n’Asturies”, y defendió que’l nuevu testu reflexe “el refuerzu de tolos servicios sociales” y el reconocimientu de derechos feministes y ambientales, ente otros. Cristina Tuero dixo que “ye mui importante la eliminación total de los aforamientos”, refirióse a la demanda d’establecer “mecanismos anticorrupción y de tresparencia democrática” y comentó que “la llei electoral ha de tener otra proporcionalidá, porque hai que tener en cuenta la realidá demográfica actual”.

Amás de los temes yá mentaos, la formación podemista quier que’l nuevu Estatutu reconoza Asturies como nacionalidá hestórica, “acordies coles categoríes espuestes na Constitución: nacionalidaes y rexones”, y que faiga referencia a “la so mirada atlántica. La so rellación histórica y llingüística con territorios como País Llionés, Portugal y especialmente Miranda del Dueru o Galicia”, asina como que se faiga constar el “calter municipalista d’Asturies” y que se potencie’l derechu consuetudinariu asturianu. La creación d’una banca pública asturiana y la Renta Básica Universal, y l’apuesta pola cooperación pal desarrollu tamién tán presentes nes propuestes de Podemos Asturies.

Pablo Martínez Testa espunxo la propuesta llingüística. FOTO: David Aguilar Sánchez

En cuanto a la oficialidá de les dos llingües propies d’Asturies, ún de los capítulos de la reforma estatutaria que más interés ta espertando na opinión pública, el partíu moráu propón que se redacte nestos términos. “L’asturianu, el gallego-asturiano o eonaviego, y el castellán son llingües oficiales d’Asturies. Una llei de la Xunta Xeneral ha establecer los términos y ámbitos del usu oficial de les llingües propies d’Asturies, y ha fixar les zones d’usu predominante d’entrambes”. Añade a ello que “los poderes públicos asturianos garantizarán l’usu normal y oficial de los trés idiomes y potenciarán la utilización del asturianu y gallego-asturiano o eonaviego en tolos ordes de la vida pública, cultural ya informativa y, dispondrán los medios necesarios pa
facilitar la so conocencia y desenrollu”.

Actualidad

Dejar respuesta

Please enter your comment!
Please enter your name here