Ganar ensin ganar

L'Asturies actual nun ye a entendese ensin l'aportación fundamental del asturianismu social

Recomendados

Xune Elipe
Xune Elipe
Músicu, cantante del grupu de rock "Dixebra" y activista en defensa de la llingua asturiana

Yá dende’l tiempu d’Unidá Rexonalista, nos primeros momentos de la Transición, l’asturianismu políticu vien llogrando unos resultaos decepcionantes. Dende entós les opciones d’esti calter namás foron quien a algamar representación en solitario na Xunta Xeneral en dos ocasiones, con Coalición Asturiana y col Pas, en dambes con un únicu diputáu; mentanto’l Bloque por Asturies, coalligáu con Izquierda Xunida, llegaría a sentar nun periodu curtiu tamién a un diputáu suyu.

Pela cueta, l’asturianismu social, un magma formáu por persones provinientes de distintes tendencies polítiques (mayoritariamente a la izquierda), integrantes d’asociaciones o colectivos culturales (dende la etnografía al folclor), profesores universitarios, escritores, músicos, activistes sociales… tuvo y tien un influencia en campos como la cultura, la sociedá o la política non pequeñu.

“L’aportación del asturianismu social foi determinante na instauración de l’actual Comunidá Autónoma d’Asturies”

De fechu, l’Asturies actual nun ye a entendese ensin l’aportación fundamental d’esi asturianismu social. Nun hai más que facer alcordanza de la repercusión y la importancia de les tesis d’aquel asturianismu ex novo que surdiera nes postrimeríes del franquismu y que condicionaría fondamente esi periodu históricu al que conocemos como La Transición. Un momentu decisivu na historia contemporánea d’Asturies, nel que se debatía’l ser y el futuru d’esta tierra y cómo debía ser la so configuración nel nuevu réxime. Daquella, los partíos mayoritarios, ayenos dafechu a les corrientes históriques del asturianismu, nun llegaben a comprender lo que taba asocediendo alredor suyu y víenlo más como una cuestión de mimetismu colo que taba desenvolviéndose en territorios como Cataluña o Euskal Herria. Tanto la UCD como Alianza Popular teníen una concepción d’Asturies venceyada al cuadonguismu más ranciu; pela so parte’l Partíu Comunista nun vía aquello con bonos güeyos, siguidor acérrime como yera del internacionalismu proletariu más ortodoxu (influenciáu por personaxes como Gustavo Bueno); y el PSOE-FSA espectante, acoyendo nel so senu a persones provenientes d’organizaciones más sensibles al asturianismu como Xuan Xosé Sánchez Vicente (del Partíu Socialista Popular d’Asturies) o Pedro de Silva (de Democracia Socialista Asturiana), pero ensin llegar a moyase del too -fiel a la so tradición centralista/xacobina-.

Foi l’asturianismu’l que primero punxo nel debate social la necesidá de l’autonomía pa esti territoriu, nun momentu en que se discutía si yera meyor formar un ente conxuntu con Cantabria o Lleón -por exemplu-; foi aquel movimientu social el qu’apurrió l’argumentación (histórica, cultural, llingüística, etc.) na que sofitar la creación d’una comunidá autónoma propia; recuperó o creó la nuestra simboloxía, ente ello la bandera (llegara a plantegase dende los nuevos representantes políticos facer un concursu o encargar una nueva, mesmamente fadríense prototipos como una formada por tres bandes verticales colos colores verde -paisaxe-, azul -mar- y negro -carbón-); popularízaría’l glayíu de «¡Puxa, Asturies!»; reivindicó la restauración del nuestru órganu tradicional d’autogobiernu, la Xunta Xeneral. Y lo más importante, creó conciencia y favoreció l’autorreconocimientu ente los asturianos y asturianes. Por too ello, l’aportación del asturianismu social foi determinante na instauración de l’actual Comunidá Autónoma d’Asturies.

La última manifestación pola oficialidá de les llingües propies del país, bien a afitar esta «anomalía» que padecemos, la d’un movimientu asturianista fuerte, dinámicu, enraigonáu socialmente y con una capacidá de movilización que, probablemente, nun tenga nengún otru estamentu anguaño (incluyendo sindicatos y partíos), pero ensin representación directa nel Parllamentu Asturianu nin nos órganos de decisión política. Inda asina, otra vuelta, gracies a él el tema estrella de la reforma del Estatutu d’Autonomía ye la posible oficialidá del asturianu y el gallego-asturianu, siendo quien a condicionar la vida política dende fuera de les instituciones. Parafrasiando’l títulu d’esti artículu, fuimos ganando ensin tener ganao.

L’asturianismu ye mui dau al pesimismu y el derrotismu, pero si echamos la vista p’atrás vemos los llogros algamaos. Más de cuarenta años de llabor paciente, serio y rigurosu n’estayes mui distintes (lliteratura, etnografía, música, filoloxía…) fixeron que llegaremos a esti momentu, con una aceptación del fechu identitariu asturianu abrumadoramente mayoritariu. Nesti sen, el trabayu de la Xunta pola Defensa de la Llingua Asturiana (convocante de toles movilizaciones en favor de la reconocencia de derechos llingüísticos de les últimes décades), pela que tienen pasao cantidá de militantes anónimos, con una capacidá organizativa como nengún otru colectivu del activismu llingüísticu, autosuficiente económicamente y referente indiscutible de la llucha en pro de les nuestres llingües, ye tou un exemplu y l’interllocutor social nesta materia.

La multitú que l’otru día salimos a la cai taba formada nun númberu bultable por xente mozo que concasa coles propuestes y la filosofía asturianistes, qu’esa masa social tenga o non una tresllación política yá ye otru cantar, pero qu’hai futuru… hailo!

Actualidad

Dejar respuesta

Please enter your comment!
Please enter your name here