Negacionistes

Lo mesmo que’l COVID 19 ye un virus, l’asturianu ye una llingua y la Tierra ye redonda.

Recomendados

Nun lo voi negar, esti artículu entamélu nomando primero a Santiago Abascal. El primer negacionista de la mio hestoria ye Isidro Fernández Rozada, de Blimea, que dicía que la so tia Nemesia nun falaba aquel asturianu inventáu na cai Fruela d’Uviéu. La tía Nemesia yera de La Cerzal y polo que se supo más tarde falaba un asturianu bien curiosu y averáu a la regla.

El segundu de los munchos posibles ye Mariano Rajoy que nun tenía tía pero tenía un primu en Sevilla que negaba’l cambeu climáticu. Los tiempos políticos fexeron que Rajoy acabara reconociendo, a la so manera, los fechos y que perdiera una moción de censura.

Negar el fechu científicu da votos o cuando menos los caltién. Cuando entrugaron a Santiago Abascal sobre si yá tenía puesta la vacuna del Covid 19 respondió con evasives sabiendo que bona parte del so nichu electoral ta precisamente naquellos sectores que nieguen fechos que nun son discutibles.

Lo mesmo que’l COVID 19 ye un virus, l’asturianu ye una llingua y la Tierra ye redonda, son fechos científicos sobre los que nun cabe discusión posible. Pos tán científicamente probaos y constataos. Dir contra la ciencia ye dir contra la racionalidá. Pretender imponer la irracionalidá, un crime.

L’ocho setiembre’l presidente asturianu, Adrián Barbón, anunció l’entamu de les negociaciones pa un nuevu Estatutu d’Autonomía d’Asturies nel que s’incluya la oficialidá de los idiomes d’Asturies. La campaña mediática nun tardó n’apaecer y como vemos na prensa asturiana los artículos contra la oficialidá surden como los peos de llobu na seronda. El peu de llobu ye una seta ensin valor gastronómicu nengún y que cuando-y das una patada suelta un fumo prieto qu’escurez momentaneamente la realidá.

Tópicu sobre tópicu, como’l del collaciu del delicuente Sarcozy, Pablo Casado, que nun tien meyor recursu que’l del “Asturias es España y lo demás tierra conquistada” pa rechazar la oficialidá, pero ye que si Asturies ye España, entós n’Asturies tien d’aplicase la Constitución Española del 78, pos hasta que se conoza, el testu refrendáu hai más de 40 años nun fai disitinciones énte autonomíes o llingües, ye claru y taxativu.

“Asuman la evidencia científica, entiendo que pa ustedes seya difícil”

Asuman la evidencia científica, entiendo que pa ustedes seya difícil pero ye qu’hasta primero se va manifestar Francisco qu’ustedes articulen un discursu con un mínimu de lóxica. El consensu sedría lo deseable, desgraciadamente pa ustedes la Tierra ye redonda y non plana como s’empeñen n’afirmar. Nun hai consensu posible nos sos términos.

Nun lu hai y nun lo pue haber porque la so visión yá nun ye que seya preconstitucional ye que ye anterior a la conquista ¿o entrega? de la península por Napoleón y continuadora de Fernando VII. Sí, si por ustedes fuera taríemos trabayando 16 hores al día pa qu’ustedes puedan tomar l’almuerzu na cama. D’eso se trata, de qu’ustedes sigan imponiendo a los demás la so visión anque vaya contra la lóxica y racionalidá democrática.

Frente al negacionismu, vacunes y oficialidá.

Actualidad

Dejar respuesta

Please enter your comment!
Please enter your name here