“Val más un centru social qu’un solar”

El Llar El Mataderu acueye’l sábadu 6 de payares una xornada de reivindicación y alcuentru n’apoyu a esti centru social amenazáu de cierre.

Recomendados

Beatriz Redondo Viado
Beatriz Redondo Viado
Periodista y profesora de secundaria.

Allá onde dalgo medra al marxe de les instituciones y del mercáu, allá que se planten. Ye’l casu del centru social Llar El Mataderu, en La Pola (Siero), que depués de siete años funcionando nel antiguu mataderu continúa coles puertes abiertes pero con una amenaza de cierre dende  2018 y con una partida presupuestaria pa derribar l’edificiu dende marzu de 2021.

Nuna situación de pandemia y crisis, l’equipu de gobiernu sierense, dirixíu pol socialista Ángel García –metíu esti añu en polémiques varies como la condena por lesionar a un vecín o el conflictu col cuerpu de policía local-, decidió meter nun mismu paquete presupuestariu procedente del remanente líquidu de tesorería de 2020, qu’ascendía 8.299.513 euros,  el derribu del edificiu del antiguu mataderu, una actuación a la que van destinar 375.986 euros, xunto con otres midíes destinaes a ayudes y obres que’l conceyu necesita dende va tiempu.

Nuna sola votación amestáronse ayudes a empreses  locales afectaes pola COVID, arreglu de caminos y carreteres, obres nes escueles o actuaciones pa la meyora del abastecimientu d’agua y saniamientu de les zones rurales con acabar con un espaciu pal que nun hai proyectu o alternativa. D’esta manera, tolos grupos de la Corporación local, sacante el conceyal de Somos, Javier Pintado Piquero, que s’abstuvo, aprobaron la midida.

“400.000 euros dicen que cuesta tirar l’edificiu. Bien los podíen gastar en coses más importantes pal conceyu, que les hai abondo, pero non, prefieren echalos en desaniciar el Llar El Mataderu. Una operación sofitada en más bilordios que fechos constatables, porque nun hai proyectu nengún pal espaciu: aseguren que  ta en ruines, anque entá nun viemos nengún informe técnicu y, al empar, rúxese que la intención ye vender, especular col terrenu públicu. Lo mínimo había ser preguntar al pueblu qué quier, facer una consulta popular y que d’una vez sea la xente la que diga lo que quier pal so pueblu”, se denunciaba’l pasáu 21 d’ochobre na manifestación que recorrió les cais de La Pola en defensa del Llar El Mataderu.

Les intenciones d’acabar col espaciu yá rescamplaron en 2018, cuando el 12 de febrero hubo una avería eléctrica nel centru de tresformación qu’abastecía al IES Escultor Juan de Villanueva, a les instalaciones del serviciu d’agues del Ayuntamientu de Siero, al Llar El Mataderu y a parte del allumáu públicu de la cai Asturias. El mesmu día iguóse’l problema nel institutu y pal serviciu d’agües y la Casa Conceyu apurrióse un xenerador.

Mentanto,  les faroles de la cai tardaron una selmana en volver a funcionar y l’edificiu del antiguu mataderu quedó al marxe de toles actuaciones del Ayuntamientu.  Cuatro díes depués, l’alcalde aseguraba que l’espaciu “taba en ruines” y cedía otru local a l’asociación xitana Mistós, que venía trabayando nel antiguu mataderu, y el 19 de febrero cortó l’agua nel edificiu, polo que’l Llar El Mataderu quedó ensin suministru elléctricu y d’agua.

A pesar de los pilancos del Ayuntamientu, l’actividá del Llar El Mataderu continuó y sigui hasta’l día de güei con biblioteca y tienda llibre y actividades de tou tipu -feministes, culturales, musicales, deportives o d’apoyu a diverses causes sociales-, col enfotu bien claru de caltener un espaciu d’autoxestión y cultura abierta a tol mundu: “Vamos siguir lluchando por esti espaciu: tenemos bien claro que val más un centru social qu’un solar. Porque nun solar lo único que medra ye l’abandonu y la basura y nel centru social lo que medra ye vida, redes sociales –de les de verdá, non virtuales- cooperación y cultura”, s’indicaba na manifestación del 21 d’ochobre, na que se convidaba a la participación na asamblea y a facer propuestes pa caltener vivu y abiertu l’espaciu.

Xornada de reivindicación y alcuentru el 6 de payares

Ello ye que baxo’l lema “El Mataderu nun se pieslla” el sábadu 6 de payares el centru social va acoyer una xornada de reivindicación y alcuentru nel Llar El Mataderu. L’actividá fáese a comuña ente los centros sociales La Xusticia, La Semiente, La Llegra, L’Apiaderu, Sestaferia CS, La Kuadra y el colectivu Les Ablanes.

Les actividades principien a les 12:00 hores cola charla “De los CSOA a los CSA: pasáu, presente y futuru”, y depués va facese un campionatu de gomeru. A les 14:00 hores ta prevista l’actuación musical de Nun tamos toes Femfarria, enantes de la comida popular. Pa la tarde, a partir de les 16:00 van entamase xuegos tradicionales pa toles edaes y a les 18:00 hores echa a andar un pasacáis. P’acabar la xornada, a les 19:00 hores, va haber un conciertu solidariu col Llar el Mataderu coles actuaciones de Disaster Sisters, Sangre d’Ochobre, The Rotten Teens, Espropiazion, Karank, Desaniciu, Ochobre y KPE [r].

Actualidad

Dejar respuesta

Please enter your comment!
Please enter your name here