Un total de 36 mupis repartíos per Xixón marquen estos díes la ruta artística, fotográfica, lliteraria y periodística de la campaña Derechos humanos y cooperación, cada vez + esenciales, que pon en marcha la Coordinadora Asturiana d’Organizaciones Non Gubernamentales pal Desarrollu (CODOPA) cola collaboración del Ayuntamientu de Xixón y de l’Axencia Asturiana de Cooperación.
El percorríu completu, que se va poder facer a traviés de tres rutes en llugares distintos de la ciudá, va tar completáu esti vienres, 10 d’avientu, Día de los Derechos Humanos. Aporten los sos trabayos a esta campaña les y los ilustradores y diseñadores Goyo Díaz, Javi Guerrero, Marco Recuero, María Ortiz, Señora Milton, Bitxo, Begmont, Sergio Llunik y Juaco Amado. Y los y les escritores y periodistes Xandru Fernández, Pilar Sánchez Vicente, Laura Casielles, Ricardo Candás, Carlos Alba Cellero, Arantza Margolles, Paloma Uría, David Acera, Ricardo Menéndez Salmón, Yasmina Álvarez y Francisco Álvarez.
