Lliberales pola oficialidá

Militantes de derecha y centru-derecha recuérdennos la tresversalidá de la llucha pola oficialidá

Recomendados

Nicolás Bardio
Nicolás Bardio
Es politólogo, escritor y creador de juegos de rol.

Que la llucha pola oficialidá de los idiomes propios d’Asturies tien un componente de clas, ye daqué no que coinciden bien d’analistes. L’asturianu y el gallego-asturiano foron y son les llingües de los mineros, de los obreros, de los pescadores, los ganaderos… pero non namás d’ellos. Empresarios del turismu, abogaos, militantes de les idees lliberales formen les bases de l’asociación Lliberales pola Oficialidá bien activa en redes sociales y con presencia destacada na manifestación pola oficialidá del asturianu del últimu 16 d’ochobre.

Alejandro López, María García e Inaciu Iglesias. Semeya: Alisa Guerrero

A partir de tertulies lliberales como la Tertulia 25 de Mayu, d’Uviéu, y de les propies redes sociales; esta organización informal pero bien activa de ciudadanos nun fixo más que medrar amodo hasta ser quien a axuntar a munches de les bases favoratibles a la oficialidá de Foro Asturias y a desencantaos d’otros partíos de la derecha asturiana.

En Nortes falamos con trés militantes d’esta asociación pa intentar averanos a ellos, ver cómo piensen, y qué idees defenden y qué los llevó a llanzar una asociación como ésta. Inaciu Iglesias, ex-conceyal de Foro Asturias y conocíu empresariu asturianista; Alejandro López, empresariu y abogáu de Cangas y María García, empresaria del turismu n’Uviéu cuéntennos les sos visiones. Son perfiles bien estremaos, dos homes y una muyer, unos con militancia política previa, otros ensin ella, activos nel sector priváu. Los tres motivaos por una mesma conceición política basada na defensa del los drechos individuales y del lliberalismu políticu. Reivindiquen  la tradición lliberal asturiana, y tamién, cómo non, un mesmo oxetivu: la declaración d’oficialidá del asturianu.

“A la izquierda tamién-y costó años resolver estes contradicciones. El PSOE ye partidariu y ye bono, pero hasta va cuatro díes nun lo yera”

Entrugámos-yos direutamente, eso sí, si consideren que la llingua y la oficialidá son otra batalla más de la llucha de clases na que tradicionalmente los trabayadores falaron asturianu y los señoritos castellanu. Niéguennoslo. Pela so parte, Iglesias, considera que ye preciso desmentir tópicoscomo, por casu, “que la oficialidá ye cosa d’izquierdes o d’ideoloxíes d’izquierdes”. Pa Iglesias ye importante “entrar nel fondu” y “aportar una visión lliberal pa qu’a la hora de llexislar too se faiga dende’l respetu a los drechos de los ciudadanos”.

Inaciu Iglesias. Semeya: Alisa Guerrero

Amás, entrugáu pola diferencia de sofitos a la oficialidá ente la izquierda y la derecha nun pierde la ocasión de ser críticu pa colos socialistes. “A la izquierda tamién-y costó años resolver estes contradicciones. El PSOE ye partidariu y ye bono pero hasta va cuatro díes nun lo yera”. Iglesias recuerda que, de tola autonomía asturiana nueve de les llexislatures presidióles el PSOE y esti partíu foi “la mayor torga” pa la oficialidá del asturianu. “Les élites son una cosa y los votantes otra”, recuerda Iglesias. L’ex-conceyal de Foro y empresariu considera que “La mayoría de los votantes de dereches tán a favor de la moderación, de la non imposición, de la equiparación de drechos de los falantes colos de los d’otres llingües españoles” pero que Les élites polítiques [de los partíos de dereches] nun tienen un modelu de qué facer col asturianu.

Lliberalismu antifascista y demócrata

Alejandro López va más allá y insiste na necesidá d’estremar lliberlaismu de conservadurismu, asitiándose nunes coordenaes asemeyaes a les del Mouvement Réformateur o l’Open VLD belgues o los Lib-Dems británicos. Ciudadanos y PP nun son lliberales, son partíos conservadoresdiz López “Históricamente na derecha siempre hebo lliberales conservadores como los que sofitaben a Fernando VII”. Frente a esto, López reivindica la tradición lliberal asturiana y cita nomes como Rafael del Riego, Melquiades Álvarez o Flórez Estrada, solliñando qu’hai una tradición lliberal asturiana y que, como coincide con él María García “hai más espíritu lliberal n’Asturies del qu’a priori pues imaxinar”. Amás, marquen toos munches distancies respeutu de la estrema derecha que, hai que lo recordar, señaló y atacó al diputáu de Foro Adrián Pumares pal que toos tienen bones pallabres. María va más allá y diz Que Vox se llame lliberal ye una broma pesada y una aberración.

Alejandro López. Semeya: Alisa Guerrero

López asítiase na mesma llinia y diz que “Nun podemos tolerar que los ultraconservadores nieguen a naide’l drechu de falar asturianu en parllamentu. Sobre too cuando dicen que son  lliberales pero piden coses tan racistes como que la nacionalidá s’algame por drechu de sangre y non de suelu”. El lliberalismu de Lliberales pola Oficialidá asítiase na llibre circulación de persones y mercancíes, na llinia de les polítiques de la UE, y refuga dafechu los plantegamientos de la ultraderecha. Por dicilo d’otra manera, trataríase esti lliberalismu d’una  “derecha económica” (llibertá de circulación, poques regulaciones, pocos impuestos, poca intervención del estáu… etc.) y d’una “izquierda social” (derechos individuales, llibertá individual y supresión de cualquier barrera al llibre determín de les persones); una visión de la sociedá que n’España tien pocos referentes pero que n’otros países europeos, especialmente en países d’importante tradición parllamentaria, sí tien un reflexo claru.


Retrocesu del lliberalismu nel PP

Toos coinciden que les idees lliberales cada vez tienen menos espaciu en formaciones que tradicionalmente les defendieron como’l PP o Ciudadanos. López diz queLos lliberales tán mui marxinaos nel PPy pon como exemplu’l fechu  de que’l partíu acabare pesllando la fundación que llevaba’l nome del lliberal asturianu “Melquiades Álvarez”. Pa García, los populares tendríenperdío’l norte y taríen “raspiando l’insultu” al dir, na so opinión, hacia la ultraderecha pos “tán viendo que la estrema derecha se ta disparándose y quieren ganar votos ehí”.

María García. Semeya: Alisa Guerrero


García comparte la visión de López y considera que, col tratamientu de la llingua asturiana, La derecha asturiana ta siendo auto-xenófoba y que tán denominándose lliberales “cuando en realidá son conservadores y tán manchando la ideoloxía lliberal”. Anque esto nun foi siempres el casu, polo menos no relativo a la llingua, pos siempre hebo dirixentes del PP que defendieron la oficialidá como foi’l casu del ex-alcalde d’Uviéu Gabino de Lorenzo o la ex-candidata a l’alcaldía de Xixón, Pilar Fernández Pardo.

“Nun impidir, nun imponer nada a naide, pero que’l que lo fala que se lu respete”

Los lliberales pola oficialidá, como faen munches formaciones polítiques, encuadran la defensa de la oficialidá del asturianu na propia Constitución Española. García sorraya que catalanes, vascos, gallegos, mallorquinos y otros pueblos disfruten d’un drechu que “nun se sabe por qué circunstancies, Asturies y el pueblu asturianu nun disfruten”.

Un modelu propiu d’oficialidá: Permitir, nun torgar, nun imponer

Anque la organización seya informal y nun tenga la intención de constituise en partíu políticu “Nun queríemos formar una estructura del S. XIX y XX” diz Iglesias, lo cierto ye que los lliberales sí tienen una visión bastante asemeyada de cómo habría ser esa oficialidá “a l’asturiana”. Como nun podía ser d’otra manera, solliñen la necesidá de facer de los “derechos individuales” y de les “escoyetes individuales” la exa.

Alejandro López, María García e Inaciu Iglesias. Semeya: Alisa Guerrero

García diz que “lo más lliberal diba ser que nun hubiere llingües oficiales”, pero, darréu diz, “si hai dos llingües, lo que nun pue ser ye qu’una lo seya y la otra non”. Iglesias va más allá y diz que cola llingua y la oficialidá “Nun hai que regular n’escesu” y que la oficialidá lo que tien que facer ye “permitir l’usu, que nun tea torgao”. López esprésase na mesma llinia: “Nun impidir, nun imponer nada a naide, pero que’l que lo fala que se lu respete”. No educativo toos tán d’alcuerdu en que ye conveniente que tolos chavales puedan tener un conocimientu mínimu que-yos permita desendolcase. María García tamién quier qu’heba una asignatura d’asturianu y pon el so propiu exemplu: “Yo yera analfabeta n’asturianu. Tuvi que deprender con cursos a escribir lo que siempre falé en casa” y diz que “Los neños han deprender a saber en qué idioma tán falando”.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí