L’equipu de gobiernu bipartitu xixonés, formáu pol PSOE y por Izquierda Xunida, y el Grupu Municipal de Podemos-Equo Xixón algamaron un acuerdu esta nueche pa roblar, nel plenu municipal de mañana, un acuerdu presupuestariu pa 2022 que va poner l’acentu na inversión social. Laura Tuero, vocera de la coalición morada y verde, anunció güei en rueda de prensa que “l’acuerdu presupuestariu supón un escudu social col sellu de Podemos-Equo Xixón”.
Esti grupu va facilitar cola so abstención l’aprobación de les cuentes del conceyu nel plenu d’esti miércoles a cambiu d’una retafila de midíes “en materia de derechos y servicios sociales, vivienda, educación, conciliación, medio ambiente y movilidá sostenible, igualdá y derechos LGTBI”. Laura Tuero esplicó que “estos presupuestos incorporen midíes o aumenten partíes presupuestaries en cuestiones de máxima relevancia pa la vida de los y les xixoneses. Falamos de derechos y servicios sociales, de vivienda, educación, conciliación, mediu ambiente y movilidad sostenible, igualdá y
derechos LGTBI, y tamién de midíes mui importantes pa los nuesos barrios y la nuesa zona rural”.
En total, dixo, trátase de 46 midíes, entee les que destacó dos relacionaes con Servicios Sociales: la nueva llinia d’ayudes que va contar con 1,7 millones d’euros (1,1 millones más de la partida del borrador del presupuestu) y l’acuerdu pa aniciar en xineru una fueya de ruta qu’actualice y reorganice les
prestaciones sociales nuna nueva ordenanza. Ente otres midíes, en materia de mediu ambiente anuncia “la nueva llinia d’ayudes pa la sustitución de calderes contaminantes y la contratación d’una persona pa informar y fomentar l’accesu a midíes d’eficiencia enerxética y autoconsumu que permita a los y les xixoneses rebaxar la factura de la lluz”.
