Nel Salón d’Actos de la casa sindical de Xixón, la organización sindical CSI va organizar trés alderiques estremaos sobre temes llaborales y sindicales. El primeru de toos, el xueves 13 de xineru va ser sobre la reforma llaboral y que lleva por títulu “¿Derogación o estafa?” Va buscar analizar les claves de la última reforma llaboral que’l gobiernu central fixo con Yolanda Díaz a la cabeza y col preste de les organizaciones mayoritaries tanto sindicales como d’empleadores, pente les que nun ta la CSI.
El xueves 20 hai otra cita más p’aldericar sobre la industria. Col títulu de “La industria somos quien trabayamos nella”, la charra va falar de les socontrataciones, la eventualidá, la precarización o la pérdiga de puestos de trabayu qu’afecten a la industria.
L’últimu xueves d’alderique, que completa tolo que queda de mes, ye’l xueves 27 de xineru, onde los servicios públicos van ocupar la exa del alderique. Col títulu de “Servicios públicos y derechos pa la ciudadanía”, la xornada va centrase na defensa de lo público énte los ataques del neolliberalismu y n’abordar temes como la sanidá, la educación o les pensiones.
