La llinia trazada por Xune Elipe

El sellu Trabe publica l'ensayu sobre la hestoria de la música asturiana col que'l músicu y activista avilesinu ganó'l Premiu Máximo Fuertes Acevedo

Recomendados

Paco Álvarez
Paco Álvarez
Periodista, escritor y traductor lliterariu d'italianu. Ye autor de les noveles "Lluvia d'agostu" (Hoja de Lata, 2016) y "Los xardinos de la lluna" (Trabe, 2020), coles que ganó en dos ocasiones el Premiu Xosefa Xovellanos.

“Hai una llinia trazada”, diz el cantar. Xune Elipe Raposo (Avilés, 1962) tiró d’esa llinia y d’esa frase pa dir trazando un regueru musical de fechos y feches, voces y instrumentos, estilos y tendencies, como actu de reivindicación de la memoria de los sones asturianos de tolos tiempos y d’una llingua milenaria que sigue lluchando pol so reconocimientu. Reflexó too eso nun testu que ganó’l Premiu d’Ensayu Máximo Fuertes Acevedo en 2020 y qu’agora ve la lluz cola editorial uvieína Trabe: Hai una llinia trazada. Historia de la música asturiana.

Xune Elipe, activista musical, fundador y cantante de Dixebra (la banda decana del rock n’asturianu, qu’acaba de cumplir trenta y cinco años d’esistencia y de resistencia), esplica que “la nuestra identidá musical foi creándose adulces a lo llargo del tiempu, escomenzando a manifestase y adoptando la so forma ente los sieglos XII y XVI. A partir del sieglu XV ye cuando s’afita la conciencia de que los asturianos y asturianes falaben una llingua diferente de los demás pueblos, siendo vistos como una comunidá humana diferenciada cultural y políticamente. Sobre esti raigañu foron incorporándose adulces en momentos posteriores otros elementos (melodíes, ritmos y instrumentos), hasta algamar la espresión definitiva que tien anguaño la música popular/tradicional asturiana”.

Cuadru del pintor xixonés Manuel Medina.

A lo llargo d’un cuartu de centenar de capítulos, el músicu de Villalegre fai un percorríu pelos “periodos, movimientos y intérpretes más importantes, resaltando los datos y fechos que foron cruciales nel devenir de la nuestra música. Y ello, diz, “dende un puntu de vista non colonial, considerando a la música asturiana como un ente vivu y autónomu, non supeditáu nin dependiente d’otros procesos”. Trátase, añade, d’una hestoria cuntada “dende dientro de la propia música del país, con un enclín claramente pedagóxico-divulgativu y militante nacional, social y culturalmente”.

Xune Elipe ye una de les figures cimeres del movimientu de reivindicación llingüística. En 1987 fundó, con otros tres rapazos, una banda de rock que diba convertise nun referente musical y ideolóxicu dientro y fuera d’Asturies, dientro y fuera tamién de les llendes del Estáu español: Dixebra. Nel tarrén musical destacó tamién como ún de los promotores del proyectu Soncai System, como fundador de la discográfica L’Aguañaz, como responsable de Goxe Producciones y como una de les alma mater del colectivu Músicos pola Oficialidá. El so primer llibru, Llingua y rock, data del añu 1996. Naide meyor qu’él pa trazar y pa saltar esa llinia que separa la música y la llingua d’Asturies del silenciu y del escaezu.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí