La necesidá de la espresión y de la comunicación artística ye dalgo que’l ser humanu lleva inxertao nos sos xenes. Pero cada ser humanu ye distintu, y organízase de maneres estremaes. Y en cada tipu de sociedá, en términos xenerales, guañen formes d’espresión, que camuden según variables espaciu-temporales, históriques, polítiques… Porque, garrando como referencia, anque seya de revisgu, les reflexones de Lévi-Strauss al rodiu los mitos, podría dicise que la cultura, el teatru, la llingua, son combinaciones estremaes de dellos elementos esenciales. ¿Podría falase polo tanto d’un teatru asturianu, venceyáu a una sociedá, un espaciu y un tiempu concretu?
Al igual que n’otros territorios, el ser humanu encaróse cola naturaleza pa la defensa y sobrevivencia de la tribu, dexando buelgues artístiques qu’asina nos lo amuesen. Los rituales dexaron pasu a l’adoración a los dioses, y más llueu al espectáculu. Emoción, terror, compasión, risa, sarcasmu. Cola Ilustración el teatru amosó la so capacidá educacional. Foi un instrumentu, talo qu’asocedió con otres artes, pa encarar problemes d’identidá individual y grupal; foi crónica y crítica histórica, social, económica, obrera, y almitió toa mena d’influyencies artístiques, incluyida la contemporánea, que de dalguna forma tórnanos al ritual.
Xenera estructures sociales y polítiques. Toos esos procesos universales, ente otros, diéronse nel mundu, y tamién n’Asturies, como paez lóxico. Pero, poques gracies, el conceutu de teatru asturianu remítenos darréu a un tipu de teatru mui respetable, pero mui específicu, que sobrevivió na so versión cásique folclórica gracies a la compasión del poder represor, y non a la complexa bayura de valores o de datos que’l conceptu xenera entendiéndolu d’un mou ampliu.
Sicasí ye entendible que’l teatru, qu’atropa aspeutos estremaos d’otres munches disciplines —magar que nun siempres emplegue la palabra—, tien munchu que ver cola llingua na que se represente y col so contestu sociocultural. Per otru llau, les artes escéniques y, poro, el teatru son, ente otres coses, una actividá profesional, pero poques de les decenes de compañíes profesionales asturianes apuesten por facer teatru n’asturianu; nun constitúi una actividá económica rentable, y el que lo seya nun depende direutamente d’elles. Anque’ teatru n’asturianu seya teatru, y mientres que n’otros pueblos de la nuesa redolada ye daqué asumío y normalizao, n’Asturies nun ye lo mesmo representar, por casu, Antígona n’asturianu qu’en castellán. Representar n’asturianu entá xenera resistencies de munches clases, ensin dubia. Y eso nun tendría por qué ser asina.
Amás nel casu que nos ocupa vuelve a cumplise aquello de que’l teatru ye un reflexu de la vida. Si nesti artículu sustiúise “teatru asturianu” por “llingua asturiana” taríemos falando cásique del mesmu procesu. Quiciabes el públicu seya de dalguna forma ayenu a estes custiones de fondu; habría que dicir que gran parte de la xente de teatru asturiana tamién lo ye (por munches razones), y por supuestu, l’Alministración, que nun xeneró hasta esti momentu preséu nengún que recueya, sistematice, ponga en valor y esparda’l nuesu patrimoniu escénicu. La oficialidá del asturianu va valinos, ente otres coses, pa ser un poco más conscientes de lo que fuimos, somos, y seremos. El teatru asturianu tamién tien falta d’ella; magar qu’entá precisa de dalgún pasu alantre más pa llegar a ser esi allampiáu y necesariu axente tresmisor de valores al serviciu de la llibertá d’espresión y de la ciudadanía.
