La Xunta pola Defensa de la Llingua alvierte de que “nun tien qu’haber más llinies encarnaes”

La XDLLA diz que "ye responsabilidá del PSOE alcontrar nos otros partíos los apoyos necesarios" pa sacar alantre la oficialidá

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

A pocos díes de qu’entame’l primer periodu de sesiones de 2022 nel Parlamentu asturianu, la Xunta pola Defensa de la Llingua Asturiana (XDLLA) fizo públicu güei un comunicáu nel qu’afirma que-y “correspuende al Conseyu de Gobiernu presentar el proyectu de llei de reforma del Estatutu y ye responsabilidá del PSOE alcontrar nos otros partíos los apoyos necesarios pa que resulte aprobáu pola mayoría cualificada de los trés quintos de la cámara”. L’históricu colectivu de reivindicación llingüística diz, respecto a les negociaciones pa sacar alantre una reforma estatutaria qu’oficialice l’asturianu y el gallego-asturianu, que “nun tien qu’haber más llinies encarnaes pa los derechos nin llímites temporales pal procesu. Mientres nun se disuelva la Xunta Xeneral nun vamos dexar de recorda-yos que siguen teniendo la responsabilidá y la obligación d’iguar la falta de derechos na sociedá asturiana”.

La XDLLA recuerda qu’acaben de cumplise cuarenta años de vixencia del Estatutu d’Autonomía p’Asturies, que nació ensin reconocer la oficialidá de les nuestres llingües propies: l’asturianu y el gallego-asturianu. Pue discutise si’l restu del articuláu avieyó dignamente o venció ensembre, pero l’artículu 4, el qu’habría reconocer los derechos llingüísticos de la ciudadanía, lleva años arregallando peles costures a pesar del intentu d’arremendalu cola reforma cosmética de 1999 y l’aprobación de la Llei d’Usu y Promoción del Asturianu, claramente insuficientes”. Nestos cuatro decenios, añade, la reivindicación llingüística “foi ganando terrén social y institucional hasta’l puntu de ser de les poques demandes que n’Asturies enllenen cais cada añu”.

L’abandonu de la Federación Socialista Asturiana (FSA-PSOE) asturianu, nel so congresu del 2017, de “la so postura contraria a los derechos llingüísticos, y la so victoria electoral nel 2019 alluguen la situación d’esti procesu dientro de la cámara, onde se sienten les 45 persones que representen la voluntá del pueblu asturianu” diz la Xunta. La XDLLA dexa claro que “defendemos una oficialidá radicalmente igualitaria nes instituciones autonómiques de les llingües d’Asturies, l’asturianu y el gallego-asturianu, que desanicie la discriminación de les persones por mor de la llingua qu’usen y que sofite la enseñanza en tolos niveles educativos reglaos y na formación de xente adulto, como garantía del derechu de tola ciudadanía a conocer y usar la llingua que decida escoyer pa comunicase”.

Poro, la Xunta pola Defensa de la Llingua Asturiana quier que’l nuevu testu estatutariu recueya “esplícitamente’l mandatu de la redacción, aprobación y implementación d’una llei orientada a la recuperación y normalización llingüístiques, con garantíes de viabilidá nel plazu más curtiu posible y ensin más condiciones que les que s’apliquen a tola llexislación autonómica”. La redacción del artículu 4 del Estatutu, que fai referencia al estatus de les llingües propies d’Asturies, “tien que ser lo más concisa, clara y llibre d’interpretaciones que se pueda apautar”.

La Xunta propón pal mentáu artículu cuatro puntos concretos redactaos n’otres tantes frases: “L’asturianu y el gallego-asturianu, como llingües propies d’Asturies, tienen, col castellanu, el calter de llingües oficiales. Los poderes públicos d’Asturies, atendiendo a la realidá sociollingüística del asturianu y del gallego-asturianu, han garantizar el derechu a conoceles y usales. Una llei de la Xunta Xeneral ha establecer los términos y ámbitos del usu oficial de les llingües propies d’Asturies y ha fixar les zones d’usu predominante d’entrambes. Nenguna persona va poder ser discriminada n’Asturies pola llingua que llibremente escueya pa comunicase”.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí