El nuevu programa qu’estrena la RPA fai un repás a lo que foi la evolución de l’autonomía asturiana estos últimos años, dende la creación en 1981 hasta l’actualidá. Nos 24 capítulos del espaciu, va facese un percorríu pela hestoria política d’Asturies colos que son y foron los sos protagonistes y l’análisis de los momentos clave d’esos cuarenta años que tresformaron Asturies. L’espaciu va falar de momentos como la preautonomía, la redaición y aprobación del Estatutu, l’asunción de competencies nueves, la puesta en marcha de servicios, el papel de los diferentes presidentes, les crisis económiques y polítiques, etc.
El primer capítulu va percorrer los antecedentes de l’autonomía con una entrevista col hestoriador Faustino Zapico, siguiendo darréu’l so pasu pel programa figures clave nes primeres décades d’autonomía, tales como Pedro de Silva, Antonio Trevín, María Victoria Escudero, Amelia Varcárcel, Antonio Masip o Xuan Xosé Sánchez Vicente, ente otros.
