Pablo González lleva yá un mes nuna prisión polaca. El periodista español ta acusáu pol estáu polacu de ser un “espía rusu”. La policía polaca detuvo a González a namás 13 quilómetros de la frontera d’Ucraína. D’entós p’acá, hebo bien poca tresparencia alredor de la detención; la única ayuda pela parte del estáu español foi una visita consular y el fechu de da-y al periodista una llista d’abogaos d’oficiu. Dellos diputaos de bien de partíos d’esquierdes ente los que s’alcontraba la diputada asturiana de Uníes Podemos Sofía Castañón manifestáronse énte los lleones del Congresu de los Diputaos pa pidir la so lliberación.
Amenaza polaca al Estáu de derechu
Esti fechu nun ye un fechu aislláu. Va unos meses la Unión Europea amenazaba a Polonia con multes y represalies pola erosión que l’estáu de derechu ta viviendo nel país eslavu, sobre manera no que cinca a la división de poderes. Amás, los drechos de les minoríes y la proteición de les persones del coleutivu LGTBI ta bien lloñe de los niveles algamaos n’Europa Occidental.
