Dixebra llancen el 22 d’abril el so trabayu nuevu

‘Ente la niebla’ va ser un ambiciosu discu-llibru formáu por venti cantares dedicaos a la memoria de las clases populares asturianes y que’l grupu va presentar en directo’l 6 de mayu n’Uviéu.

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

Dempués de 35 años de carrera ininterrumpida, Dixebra vuelven a l’actualidá discográfica cola so obra más ambiciosa y personal. El 22 d’abril van publicar ‘Ente la niebla’, un llibru-CD con 118 páxines y 20 nuevos cantares nos que’l míticu grupu avilesín de rock astur percuerre la historia de la clas obrera asturiana. Yá se pue sentir nes plataformes dixitales un adelantu d’esti trabayu que va presentase en directo’l 6 de mayu na sala Tribeca d’Uviéu y que yá se pue acutar en preventa con merchandising del grupu.

‘Ente la niebla’, va ser la obra más ambiciosa y personal de Dixebra. Música, lliteratura, ilustraciones y fotografía histórica axúntense nun trabayu conceptual nel que collaboren periodistes, escritores, profesores, historiadores, ilustradores, dibuxantes… que, coles sos creaciones, reflexonen sobre’l pasáu, el presente y el futuru de la clas obrera asturiana.

Con esti filu conductor preséntase un conxuntu de venti cantares -ordenaos cronolóxicamente- que traten de la llucha obrera, la resistencia antifascista, la represión franquista, l’exiliu, los fugaos, la emigración o les movilizaciones populares. Musicalmente van sentise composiciones d’aire distintu ente sí: rock, reggae, ska, folk, funk, metal… nuna bayura de soníos que sigue la filosofía musical dixebriega. Un exemplu de too esto ye’l single “Ente la niebla”, primer de los dos adelantos que’l grupu va asoleyar.

La obra tien tamién un calter colectivu. Y, amás de les collaboraciones musicales de Toño Gómez (trombón), Rubén Bada (violín), José Manuel Tejedor (gaita), Javier Tejedor (acordión), Lluci Palomares (voz) o Bárbara González-Quevedo (voz); van tar los testos y ilustraciones de nomes como Rubén Vega, Pablo Texón, Marta Mori, Rafa R. Valdés, Irene Faza, Faustino Zapico, Miguel Solís, Penélope Miranda, Alfonso Zapico, Nieves González, ente otros. Amás, el llibru -que compila tamién fotografía histórica- va abrise con un testu de Primi Abella (guitarrista) onde fala de cómo foi’l procesu de creación de los cantares y de les temátiques de caún, y va zarrase con otru de Xune Elipe (cantante) sobre la rellación histórica de la música y les lluches de les clases populares asturianes.

Conciertu de presentación

El vienres 6 de mayu (Día de les Lletres Asturianes) a les 20.30h Dixebra van actuar na sala Tribeca d’Uviéu pa presentar ‘Ente la niebla’ en directo. Les entraes físiques yá tán a la venta por un preciu anticipáu de 12 € en L’Esperteyu (Uviéu), Trisquel (Xixón), El Cafetón (Avilés) y online en Woutick.es. A esti conciertu van siguir otros nueve yá confirmaos, tanto dientro como fuera d’Asturies, que la banda va dir anunciando.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí