Los sindicatos agospiaos na Casa Sindical de Xixón protesten énte la situación na que tán los sos llocales. El ministeriu de Trabayu entamó’l procesu pa facer una permuta del edificiu col ayuntamientu de Xixón. D’esti mou, los sindicatos CGT, CSI y CNT habrán de re-agospiase n’otros llocales públicos. Los sindicatos critiquen la falta de comunicación per parte de les instituciones.
Asina, los sindicatos qu’anguaño tán na Casa Sindical dicen que namás s’enteraron del cambéu “al consultar la páxina web del ministeriu”. Los sindicatos algamaren un alcuerdu col anterior Oficial Mayor del ministeriu pa que s’arreglare l’edificiu. Sicasí, cola llegada en 2020 de la nueva funcionaria, estos alcuerdos quedaron pa prau.
Fines especulativos
Los sindicatos xixoneses consideren que la situación del edificiu, cerca de les principales estaciones de la ciudá y al pie del parque El Solarón, consideren que pue haber planes pela parte del Conceyu de facer ellí “operaciones urbanístiques con fines especulativos”. Amás, nun se plantega derribar l’edificiu, sinón namás reagospiar a los sindicatos que lu tán usando. Los sindicatos entienden, poro, que l’edificiu va tener que s’arreglar en cualquier llugar y que si nun lo fai’l ministeriu habrá facelo l’ayuntamientu.
Nun ye la primer vez
Lo cierto ye que nun ye la primer vez que s’intenta desagospiar a los sindicatos de la Casa Sindical de Xixón. Na CNT afirmen que la última vegada que quixeron echalos “díxose-yos que nun yera estructuralmente estable” pero que, polo visto, “planiárase una comisaría”. Agora “dicen que nun hai perres” pero si vienen otros organismos la reforma van tener que la pagar igualmente.
Tamién hai quien fai una llectura en clave política sindical de la decisión. Pos nengún de los sindicatos que tán agospiaos na casa sindical sofitó la reforma llaboral de Yolanda Díaz, que sí sofitaron los sindicatos mayoritarios, CCOO y UGT. Los trés sindicatos tienen claro que nun van abandonar la Casa Sindical y van defendela hasta les sos últimes consecuencies.
