El fotoperiodista Gervasio Sánchez va presentar hasta’l 5 de xunu nel Museu Barjola, de Xixón, la esposición “Activistas por la vida”, na que documenta la situación de defensores de la natura y de los drechos sociales y humanos en Guatemala y Hondures. La esposición organízala Soldepaz-Pachakuti col sofitu de l’Axencia Asturiana de Cooperación al Desendolcu y la conceyalía de cooperación del Ayuntamientu de Xixón.
“Activistas por la vida”, de Gervasio Sánchez (Córdoba, 1959), esplica la hestoria d’homes y muyeres que lluchen pol so territoriu y la so natura y polos drechos de les muyeres y les llibertaes ciudadanes.
Esta defensa de los drechos humanos entra en conflictu colos intereses d’inversores, empreses o grupos tresnacionales que saquen con impunidá los recursos naturales y les materies primes d’Hondures y Guataemala pa vendelos nel mercáu internacional.
Al traviés de les semeyes, testu y videoentrevistes “Activistas por la vida” desplica la vida d’homes y muyeres qu’aínda tando amenazaos de muerte lluchen polos sos drechos.
Gervasio Sánchez deplicó que la realidá que se cuenta nesti proyeutu fotográfitu tien que ver cola vida cotidiana de persones a les que puen asesinar en cualquier momentu.
Trátase de persones escorríes pola defensa y la integridá de les sos aldees y que lluchen como defensores de la tierra, escontra les grandes empreses estractivistes y de periodistes qu’intenten denunciar lo qu’asocede en Guatemala y Hondures, señaló
