El Principáu d’Asturies rinde homenaxe al músicu y dibuxante de cómic Igor Mediu (1972-2006) con una esposición de la so obra gráfica, un llibru y un documental sobre la so vida y un conciertu, en el marcu de la 43 Selmana de les Lletres Asturianes, que inauguróse esti martes.
Les actividaes empezaron nel Paraninfu de Llaboral Ciudá de la Cultura cola presentación del llibru “Igor Medio. El carbón y l´arena” , nel que dellos autores glosen la figura del artista.
El Muséu Barjola acueye la esposición “Xente Llano de Xixón”, qu’axunta orixinales de les viñetes firmaes por Igor Medio y publicaes en medios de comunicación y dalgunos de los preseos qu’utilizó nel grupu Felpeyu, del que formó parte.
Na inauguración de la muestra, la conseyera de Cultura, Política Llingüística y Turismu, Berta Piñán, destacó la capacidá d’Igor Medio pa espresase na doble aguada de la música y el dibuxu y la so “militancia” pola llingua asturiana. “Igor llegó a un públicu xeneral con un efectu potente practicando’l llinguaxe de la empatía con un talentu estraordinario y dexó un legáu estremu”, dixo la conseyera. Añadió que l’artista, nacíu nel barriu xixonés d’El Natahoyo en 1972, “nun se conformó cola versión estandarizada de la vida”.Piñán ratificó’l compromisu de la Selmana de les Lletres con autores de llingua asturiana y anunció que nes ediciones venideres va apostar por “voces nueves que lleguen con muncha fuercia”.
Llaboral Ciudá de la Cultura va ser l’escenariu del conciertu homenaxe que se va facer mañana, miércoles, cola participación de Felpeyu y d’integrantes de los grupos Tuenda, DRD, La Bandina’l Tombu y Corquiéu, acompañaos por José Manuel Texedor, Mapi Quintana, Bree Delian y Alberto Sánchez, ente otros.
