Quién foi Ígor Medio, qué ye Ígor Medio

La Selmana de les Lletres Asturianes qu'arrinca güei, ta dedicada al músicu y dibuxante de cómics xixonés muertu en 2006.

Recomendados

A lo llargo de bien d’años, la Selmana de les Lletrres Asturianes dedícose a persones que desenvolvieron la so carrera, les más d’elles, a primeros y mediaos del sieglu XX. Neses ediciones échabase la vista atrás pa reclamar a figures valorando la so obra, pero tamién pa resignificalos, pa incorporalos a la hestoria de la lliteratura asturiana dende la dignificación y l’arguyu, y non como una curiosidá más o menos simpática de la nuestra hestoria.

Pero a partir de 2004, cuando la Selmana les lletres se dedica al xixonés Andrés Solar, la mirada cambia hacia persones que vivieron y crearon a partir del surdimientu. Escritores del surdimientu como’l mentáu Solar, María Teresa González o Manfer de la Llera nun necesitaben ser resignificaos pa incorporalos a una mirada moderna cola que tratar el nuestro idioma. Yeren persones con consciencia de tar faciendo dalgo nuna llingua arrequexada pol poder políticu, económicu y mediáticu, y qu’eso nun tenía porque ser asina.

Y nesto que en 2022, tengo pa min, damos otru reblagu xeneracional y alcontrámonos con una Selmana dedicada a Ígor Medio, el nuestru Fígor, el músicu y dibuxante xixonés que representa muncho de lo bueno que, contra vientu y marea, se puede llegar a facer nesti país. Sobre quién foi Ígor hai abondo escrito, y esta mesma Selmana podéis facevos col llibru editáu pola Conseyería de Cultura nel que un bon piñu de collacios y collacies cuenten muncho de la so vida y obra. Pero yo quixera namás que facer un apunte de non tanto de quién foi, sinón de qué ye.

Felpeyu

Digo “qué” porque Ígor Medio espardióse tanto y de tantes maneres que rebalsia a la so propia persona, daqué acutao a mui pocos. Tien sitiu na hestoria de la música asturiana como pieza clave nel afitamientu de la revolución folk n’Asturies, foi fundador de Felpeyu y músicu d’otres bandes, pero tamién, y ehí ta la clave, inspirador en fondu y forma de munchos otros que llegaben a esti mundu. Una escena musical, de lo que seya, necesita referentes sólidos pa construir y facer evolucionar lo que quier contar, y con Ígor tenemos ún.

“Ígor apostó pol asturianu d’una manera arguyosa, desprexuiciada y cuando foi necesario, militante”

L’Ígor dibuxante tamién ta grabáu pa siempres como fitu de la hestoria del tebéu asturianu. De la so obra rescampla esos Simpsons asturianos colos que nos dió un iconu pop que podemos regalar a xente foriato pa intentar desplica-yos cómo funciona esti país. “La Familia Castañón”, reflexu de xeneraciones y humor autóctonu,

La Familia Castañón

Poro, Ígor Medio nun necesita ser resignificáu de nenguna manera. Como se va facer nesta Selmana de Lletres Asturianes, namás tenemos que conocer la so producción pa decatanos como Ígor apostó pol asturianu d’una manera arguyosa, desprexuiciada y cuando foi necesario, militante. Ígor forma parte d’eses persones que dende la Transición fueron quien a dar la vuelta a la percepción que se tenía de la creación n’asturianu, peleando contra  una maquinaria política, mediática y económica qu’emburrió tolo que pudo na otra dirección.

Decatémonos de que a lo llargo d’estos años construyóse una manera nueva de rellacionanos col nuestru idioma. Ye un procesu hestóricu que tamos viviendo y que se consigue, en parte, gracies a persones como Ígor, referentes que van surdiendo pol emburrie dende abaxo d’una sociedá que se quitó d’enriba años y años de prexuicios. Ye dicir, Ígor Medio nun nos aportó namás na música y nel cómic, tamién nos ayudó a entendenos como país d’otra manera, a quitar mieos y facenos les entrugues adecuaes p’asina pensar n’otru futuru pa esti requexu del mundu nel que vivimos. Ígor írguise, de manera involuntaria, como un referente de lo que podemos llegar a ser texendo colo que tenemos más cerca cola mirada llonxe. Ígor Medio dexónos un legáu d’una tamañu que col tiempu y la perspectiva diremos viendo, de verdá, toles  sos cares. Yá lo tamos faciendo. Gracies, Ígor

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí