La información como conderga

Enfrente los apresaos na cueva platónica, qu’entá teníen la posibilidá de salir y ver el mundu verdaderu, agora tamos atrapaos na información.

Recomendados

Josep Carles Lainez
Josep Carles Lainez
Llingüista, escritor y editor, foi columnista del selmanariu Les Noticies (2000-2004). Tien asoleyaos los poemarios Lenta lletanía del cuerpo nel hedreru (ALLA, 2007) y La piedra ente la ñeve (Trabe, 2010), y algamó en dos ocasiones el Premiu de Teatru de l’Academia de la Llingua Asturiana, coles obres Elsa metálico (ALLA, 1998) y Thule (ALLA, 2010). Amás d’ello, realizó la edición y torna de la Poesía asturiana completa (Palmart, 2009) del filósofu Lluis X. Álvarez.

Byung-Chul Han (1959) déxanos escosos de pensamientu, y torga’l pasu, con pallabres y con fechos, a cualsiquier triba d’optimismu respeutive al futuru. Nel so llibru Infokratie (Infocracia, Barcelona, Taurus, 2022 [2021 pa la edición n’alemán]), paradóxicamente’l caudal de cites y de nexos que nos apurre arrampla col eventual diálogu o cola nuesa capacidá crítica, y, n’esi argayu d’información, la esperiencia llectora ye lo más asemayada posible a lo que’l filósofu coreanu desea poner de manifiestu: non la crisis de la democracia, como se llee en subtítulu, sinón la so fin y, como consecuencia, el final de la verdá. Al ser humanu de güei, resulta-y imposible mandase de les exes que sustentaron la so esistencia.

Nesti volume, Han nun cita a Jean Baudrillard (1929-2007), nin tampoco a Jacques Derrida (1930-2004), pero tán ehí, perbaxo’l discursu, igual que les estructures rizomátiques de Gilles Deleuze (1925-1995) y Félix Guattari (1930-1992). Nesti sen depredativu de los sos fundamentos, díbemos atrevenos a dicir que Han ye un postfilósofu. Conversa cola tradición occidental (non cola oriental), pero la reduz dacuando a esos datos informativos que se tornen irrelevantes pa un testu, el de so, que quier ser paradigma de la verdá. Lloñe d’afirmaciones mayestátiques, el profesor de Berlín pelo menos abulta verosímil nesti tiempu de posverdaes.

El filósofo coreano Byung-Chul Han

Y, xustamente, esa ye la idea central d’Infocracia: vivimos na posverdá (esta pallabra nun apaez na torna castellana, pola mor, cuido, de les equivalencies que diben perdese con otres de la familia del términu alemán que traduz el post-truth inglés: postfaktisch). Pero esti tiempu de posverdá nun debe interpretase a mou de nueva dómina “filosófica”: al contrario, ye’l momentu qu’augura’l fin de la democracia y mesmo’l del ser humanu nes referencies que lu configuraron hasta esti sieglu. Nos formigueros nun hai diálogu social nin elecciones ciudadanes.

El filósofo francés Michel Foucault (1926-1984)

Han entama’l so llibru contraponiendo la sociedá de la vixilancia –según analizó Michel Foucault (1926-1984) en Surveiller et punir ([Vixilar y castigar] 1975)– y la sociedá de la información: dos réximes que los oxetivos punitivos són estremaos: enfrente’l buscu antiguu d’un control biopolíticu, anguaño persíguese un control psicopolíticu. Les persones siéntense llibres dafechu, quiciabes más llibres que nunca; entá nun se decataron d’un cambiu básicu: el control se produz agora de forma distinta: non pela represión de los cuerpos y el so alloñamientu del texíu social, sinón pela esposición permanente. La llibertá nun ye real, ye namái una llibertá sentida. Esta “comparecencia” pública implica amosase de manera continua, ensin pilancos, y, poro, xenerar una serie d’informaciones (gustos, atracciones, tendencies…) al algame de toos, y, sobre manera, de los propietarios de les redes au tien llugar esa esposición. Al remate del procesu, el ser humanu dexa de ser dalgo orixinal pa convertise nun conxuntu de datos, que, ensin dubia, serán usaos pal beneficiu de daquién. Predecir el comportamientu de la humanidá ye un oxetivu d’informáticos y empresarios como Alex Pentland (1951), quien escribe directamente sobre la muerte de la individualidá.

Si esto quedare na esfera económica, diba ser un problema. Lo grave ye que, ente otros elementos de la manipulación, pasó al ámbitu políticu, y Byung-Chul Han refierse a les elecciones americanes de 2020. Nun hebo discursu públicu nelles, nin debate, nin escucha de los puntos de vista del otru, nin propuestes, nin verdaes, sinón memes, bots y tuits que crearon una realidá paralela… y falsa. La sociedá americana esmigayó en tribus, les cuales retroalimenten les sos esperances, los sos deseos, los sos mieos. Tribus que tán rexíes pola ausencia de referencies oxetives. Trátase d’un pasu más p’allá de la mentira: ye’l despreciu total de la verdá. Amás, “la información nun ye un recursu pal conocimientu, sinón un recursu pa la identidá” (p. 52). Y esa identidá ta xenerada por una realidá que nun esiste, y amás creada, al cabu, pa estrayer datos… El bucle zárrase na manipulación.

Namái quedaría, a mou d’espaciu de llibertá nel ser humanu, la esperiencia interior –sintagma con ecos de Georges Bataille (1897-1962), otru pensador francés…–, que’l mesmu Byung-Chul Han implementa dende’l planu teóricu (el so llibru Philosophie des Zen-Buddhismus ([Filosofía del budismu zen] 2002)) y dende’l prácticu: la esperiencia del cuidu de les sos flores espeyada en Lob der Erde. Eine Reise in den Garten ([Lloanza de la tierra. Un viaxe al xardín] (2018)].

Jean Braudillard

Han nun ye un filósofu complaciente. Nun da llugar a la esperanza. Nun propón. Llimítase a llevantar acta d’unos fechos, d’un momentu de la sociedá actual, cuando cambia de direición pa embredase al vacíu. 

Enfrente los apresaos na cueva platónica, qu’entá teníen la posibilidá de salir y ver el mundu verdaderu, agora tamos atrapaos na información. La lluz de la verdá apágase dafechu. Nun esiste un esterior de la cueva de la información” (p. 91). Esi espíritu, digámoslo, nihilista refléxase mesmo na prosa y nel estilu del filósofu coreanu, ensin concesiones estétiques, atropando una idea tres d’otra, aniquilando xuegos, destruyendo complicidaes. Nesti mundu d’información y de tresparencia, la verdá ya nun significa nada. Nin, pa dalgunos, tampoco nós.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí