‘Collacies’, un exerciciu d’autocuidu

Puru Remangu presenta la so nueva coleición pa desvirtualizar cares y querese mentantu texe redes en Loadin… system.

Recomendados

Elena Plaza
Elena Plaza
Es periodista, formadora en cuestiones de género, contadora de historias y enredada entre ruralidades.

‘Collacies’ nun ye solo tres collacies alrodiu la barra un bar. Nin tampoco ye, simplemente, la nueva colección de Puru Remangu. Collacies fala tamién de los cuidos, non solo del autocuidu, sinón de curiar el nuesu entornu, a la nuesa rede, a la que nos sofita y ayuda a siguir pa alantre. Como en cada coleición d’Enar Areces González, hai un posu detrás qu’equí sirvió tamién pa celebrar el fin del andanciu y poner cares a eses rellaciones virtuales “porque nun mos conocemos y dende Puru Remangu vendemos muncho per Internet”.

Puru Remangu, o lo que ye lo mesmo, Xicu Ariza y Enar Areces. Foto: David Aguilar Sánchez.

Asina que se celebró per tolo alto la presentación d’esta nueva coleición aprovechando esa rede col espaciu Loading… System, de Xixón, “pa desvirtualizanos y facer folixa de collacies. El diseñu fala tamién de l’amistá sana y de la salú mental, de la importancia de la amistá real y lo valores qu’hai detrás”. Y d’ehí esti eventu con dos partes: una primera qu’inclúi charra con Cristina Calvo, psicológa y parte del equipu de Loading, pa falar del finxu, del cuidu y de les collacies, “tres valores bien importantes. Vieno munchísima xente y hasta quedaron fuera dalgunes, asina qu’a lo meyor lo repetimos, porque quedó demostrao, cola participación, que ye un tema qu’interesa”, desplica Enar.

La segunda parte ye la más folixera, con comida a cargu de Gastrochigre, bebida de cerveza Caleya y sidra Prau Monga, de Viuda de Angelón, y música con DJ Mediocre y Sandra.

DJ Mediocre pinchando na folixa. Foto: David Aguilar Sánchez.

Enar diznos qu’hai que perder el miéu, qu’hai que salir del cliché de qu’una marca d’Asturies n’asturianu nun vende fuera. “Vendemos fuera a xente qu’emigró dende fai muncho, y ye una realidá, pero tamién hai muncha xente de fuera a la que-y presta la marca, los valores, y gústa-y la identidá, porque la identidá llama a la identidá, lo mesmo que cuando yo voi a Catalunya o Galiza m’interesa lo d’ellí, pasa al revés. A la xente présta-y y ye lo que quier. L’otru día una moza chilena que volvía pa Chile llevó coses de Puru Remangu porque entendía que yera auténtico, non el típicu souvenir”, desplica la diseñadora.

Gente en la entrada de Loading… system. Foto: David Aguilar Sánchez.

No que se refie a utilizar l’asturianu como una seña de marca, Enar Areces diz que “nun quiero acaparar tol mercáu, pero queda claro qu’hai una demanda y que cuanto más faigamos, meyor pal asturianu y pa la identidá asturiana. Yo siempre animo a entamar proyectos n’asturianu”.

L’espaciu enllenu. Foto: David Aguilar Sánchez.

Y equí volvemos a les collacies, a los cuidos, a la rede: “Si nun fuera poles mios collacies, Puru Remangu nun hubiera arrancao, y nun ye solo porque te compren, sinón porque faen que te sientas valorada. Y la marca nun dexa de crecer, asina que ye importante reivindicalo”. D’ehí qu’en cada proyectu defenda un conceptu, reivindique y visualice un tema.

Delante del mural de Lucy Henshall. Foto: David Aguilar Sánchez.

“Con Loading había ganes de facer daqué, pero quería que fuera dalgo que contar, non solo folixa de comer, beber y bailar. Tamién hai un vínculo mui personal con Gastrochigre , con Caleya… que too seya importante como una rede de collacies. Amás Loading ye un espaciu dignu de dar a conocer, ye mui importante en Xixón pa texer rede”, diz la diseñadora xixonesa.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí