Asturies tien futuru al marxe d’un Gobiernu español que renuncia defender los intereses asturianos

El "Gobiernu más progresista de los Borbones" refugó toles iniciatives d’Andecha Astur pa caltener l’emplegu y los drechos llaborales nesta empresa.

Recomendados

Llucía Fernández
Llucía Fernández
Vocera d´Andecha Astur

Alsa, Alu Ibérica, ArcelorMittal, Asturiana de Zinc, Danone, Delcom, Duro Felguera, EBHI, General Dynamics, Just Eat, Konecta, Lacera, Mataderu Xixón, Modultec, MRT, SAD, Serunion, Sespa, Vayen… Les polítiques industriales y sociollaborales del Gobiernu español y de la so sucursal, el Gobiernu’l Principado, van tayando grandes firíes nel texíu productivu y la rialidá llaboral d’Asturies.

Ye’l momentu d’axuntar tola fuercia social posible pa defender a les compañeres y compañeros afeutaos pola cris que xenera’l sistema capitalista y que l’Estáu español llanta sobro nós. Pero ye tamién el momentu afayaízu pa defender, con más puxu que nunca, el camín que lleva haza polítiques industriales y sociollaborales alternatives, porque son necesaries y posibles.  Porque sabemos cuáles son. Y porque, comu’l derrotismu ye otru enemigu de la xusticia y la llibertá, percreyemos qu’Asturies tien futuru.

La llista d’empreses en cris qu’hai n’Asturies y el comportamientu del Gobiernu español PSOE-Podemos-IU y del gobiernín d’Adrián Barbón na xestión d’esta situación d’emerxencia social, son la meyor preba de la tesis que defendemos. Si la gobernanza d’Asturies sigue en manes de partíos españoles, que mos tienen comu finca pa la esplotación de recursos y fonte pa l’acumulación de capital de grandes corporaciones, Asturies allargará esti periodu de desguace, que se define por una doliosa migración forciá de la mocedá y asturianos n’edá llaboral, un xorrecimientu descomanáu de les situaciones de probitú y esclusión social, una mayor precarización de les condiciones llaborales, una privatización progresiva de sirvicios públicos básicos, una atención social mui ruina, un frañimientu de la rellación tradicional y equillibrá población-territoriu, una espropiación de los recursos propios, un debilitamientu de la identidá asturiana, una cris demográfica que tolo agrava y, en fin, una fendeúra ca vegá mayor ente les clases poderoses y el pueblu trabayaor.

Esa responsabilidá de los partíos españoles na cris pervese nel casu d’ArcelorMittal. Apocayá Andecha Astur presentó, al traviés del portavoz d’EH Bildu nel Congresu los Diputaos, Oskar Matute, unes entrugues sobro les intenciones del Gobiernu español na proteición de los trabayaores asturianos d’esta empresa. Pos bien, agora, ensin nengún pudor, el Gobiernu PSOE-Podemos-IU, supuestamente progresista, acaba d’esclariar que nun camienta tomar nenguna midía de proteición de los trabayaores nin de defensa de los intereses públicos.

El Gobiernu español nun se ñega a ello tres un alderique baleru, non. Ñégase a defender Asturies y los sos trabayaores dempués de que, neses entrugues, Andecha Astur-y plantegase varies soluciones posibles pal conflictu d’ArcelorMittal.

El Gobiernu español renuncia a tomar iniciatives, comu-y pidía Andecha Astur, pa garantizar los puestos de trabayu n’ArcelorMittal, una corporación que menacia con reestructurar la empresa, recortar la produción y desaniciar más de mil emplegos.

El Gobiernu español tampocu nun va facer un res pa consiguir otra de les desixencies d’Andecha Astur: que la plantilla d’ArcelorMittal disponga yá del conveniu llaboral al que tienen drechu y que la empresa retarda too siguío.

Al empar, el Gobiernu español refuga otra propuesta nuesa: la posibilidá de determinar la entrá de l’Alministración Pública nel aicionariáu d’ArcelorMittal, comu xusta compensación a los miles de millones d’aídes públiques que recibe esta multinacional.

El “Gobiernu más progresista de los Borbones” refugó toles iniciatives d’Andecha Astur pa caltener l’emplegu y los drechos llaborales nesta empresa y pa defender la prioridá de los intereses públicos. Ésta ye la meyor preba de que PSOE, Podemos ya IU sólo tán nel poder pa siguir xestionando los mecanismos d’esplotación afitaos pol sistema capitalista, y qu’arrenuncien espresamente a emplegar los preseos posibles que valdríen pa defender los intereses de los trabayaores y de les propies Alministraciones Públiques. Al mesmu tiempu, PSOE, Podemos ya IU preséntense, una vegá más, comu partíos españoles dafechamente ayenos a los intereses d’Asturies y de la so clas trabayaora.

El collaboracionismu del Gobiernu español, y de la comparsa que preside Adrián Barbón, coles corporaciones nun se ve sólo al analizar el conflictu n’ArcelorMittal. Ye una costante na cris industrial y llaboral que carez Asturies. De los partíos españoles sólo se puen esperar xestos, malos apaños, intervenciones publicitaries que blanquien los preseos d’esplotación y represión llaboral… PSOE, Podemos y IU protexen lo fundamental de la reforma llaboral del PP. Y, pa si te defendes, protexen tamién la Llei Mordaza del PP. Nun van venir de la man de partíos españoles les soluciones que necesita Asturies. Llevamos años viéndolo, sabiéndolo, sufriéndolo. Y el so comportamientu nel casu de la mayor empresa qu’anguañu tien Asturies ye una preba más, contundente, pero sólo una más.

Poro, Andecha Astur considera necesario que toa Asturies saque conclusiones polítiques d’estos fechos y que les tresllade a les prósimes elleiciones, facilitando’l cambiu políticu radical (ello ye, de raíz) que necesita Asturies: un gobiernu propiu que la defenda de verdá y una presencia en Madrid que garantice que les asturianes y asturianos tienen, comu otros pueblos, voz propia énte’l Gobiernu español.

Per otru llau, Andecha Astur confirma’l valir de la so coalición Agora Repúbliques (con EH Bildu, Esquerra Republicana y otres fuercies nacionaliegues del Estáu) y sigue ufriendo a les y los trabayaores d’empreses en cris la posibilidá de desixir soluciones al Estáu español y de facer más visible la so llucha, que ye tamién la nuesa.

Porque Asturies tien futuru y ta nes nueses manes.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí