La Xunta pola Defensa de la Llingua pide a ADIF Y RENFE un usu “más rigurosu” de la toponimia

La XDLA denuncia amás que'l Consorciu de Tresportes d'Asturies "sigue incumplimento la llegalidá toponímica"

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

La Xunta pola Defensa de la Llingua Asturiana (XDLA) pide a ADIF y a RENFE un usu “más rigorosu y integral, con atención especial a les redes sociales, páxines webs y aplicaciones móviles” de la toponimia oficial d’Asturies, que la xestora de la infraestructura ferroviaria y la operadora de la rede de ferrocarril empezaron a utilizar va un añu.

N’avientu de 2020 la Xunta presentó un informe sobre l’incumplimientu de la toponimia oficial na rede de ferrocarril d’Asturies y dos meses dempués presentaron el mentáu informe al director xeneral de Política Llingüística, Antón García, que “mostró interés nél y comprometióse a trabayar col Ministeriu de Tresportes pa que se respetare lo más rápido posible la toponimia oficial”. Como resultáu d’esi procesu, “empezaron a vese los topónimos oficiales nes pantalles informatives de munches estaciones de la rede y tamién nos cartelos esquemáticos d’horarios n’apeaderos y estaciones”. Sicasí, esti avance “nun ta presente en toles instalaciones: por exemplu, nes estaciones d’Uviéu y Xixón les pantalles de RENFE nun respeten la toponimia oficial y les de FEVE sí. Tampoco detectemos tovía que s’use nes pantalles y avisos sonoros dientro de los trenes”.

La XDLA señala que “un campu con muncha difusión y al que tovía nun llegó la normalización toponímica son les aplicaciones móviles oficiales de les dos compañíes (ADIF y Renfe Cercaníes), les páxines webs (nel casu de les Cercaníes Renfe nun hai presencia nenguna de la toponimia oficial; nel casu de FEVE, sí apaez nel buscador d’estaciones pero de manera incorrecta porque figura a continuación de la forma que yá nun ye oficial) y les redes sociales”.

El Consorciu de Tresportes nun respeta la toponimia

La Xunta denuncia amás que depués de cuasi venti años de la oficialización de los primeros topónimos, el Consorciu de Tresportes d’Asturies (CTA) “sigue incumpliendo la llegalidá toponímica. Cuando na señalización de carreteres de titularidá autonómica se tán respetando les denominaciones oficiales, resulta inesplicable esi desdexamientu por parte de los responsables políticos”. Recuerda que ye la Viceconseyería d’Infraestructures, Movilidá y Territoriu, dependiente de la Conseyería de Mediu Rural y Cohesión Territorial, la que xestiona’l CTA, “entidá que manexa cientos de topónimos na so actividá diaria en vehículos, anuncios, señales, horarios, web, etcétera”.

La XDLA considera que “ye fundamental el papel de normalización social que xuega una entidá que xestiona la movilidá de cientos de miles de persones usuaries. El Gobiernu asturianu, si de verdá quier demostrar el so compromisu cola recuperación toponímica, tendría que dase cuenta de la importancia que la CTA tien nesti aspectu”. Afirma que “ye una de les munches coses que’l Gobiernu d’Adrián Barbón podía tener feches yá nesta llexislatura. Nun ye cuestión de consensos nin d’amabilidaes. Trátase de cumplir cola llegalidá”.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí