Bienllegaos, Aína

Tienen voluntá y quiero creyer que tán abiertos a dialogar y llegar a alcuerdos con otres fuercies y sectores de la izquierda alternativa d'esti país.

Recomendados

Xune Elipe
Xune Elipe
Músicu, cantante del grupu de rock "Dixebra" y activista en defensa de la llingua asturiana

Esti domingu pasáu, nel Teatru El Llar de Corvera, desarrollábase’l Congresu Fundacional d’Aína, una organización nueva que se define como soberanista d’izquierda, cola intención de trabayar en temes como la defensa del territoriu, la reindustrialización, el mediu rural o’l fortalecimientu de los servicios públicos. Esta primer xuntanza organizativa vieno precedida d’una campaña publicitaria y d’agitprop mui llamativa, estéticamente impecable, de calter modernu y mui distinta a lo que nos teníen avezao les organizaciones asturianistes.

Nacen, según manifiesten, pa reconstruyir un espaciu políticu como ye l’asturianismu progresista, anguaño falto d’una mínima coordinación, con pequeños grupos, colectivos o personalidaes espreganciaos n’otros proyectos o directamente inactivos. Van tener llabor abondo per delantre, en viendo la situación na qu’esa cultura política ta dende hai yá años, depués de los fracasos electorales continuaos dende la llamada Transición. Y ye que, asina como l’asturianismu cultural xugó y xuega un papel referencial na sociedá asturiana, non asina’l políticu, que, como llevo rescamplando dende cuantayá, cayó nun estáu mezcla de frustración, resignación y derrota. Infundir optimismu tendría de ser la primer xera de tou proyectu asturianista que quiera tener posibilidá de futuru. Aína surde con bones sensaciones nesti aspectu, con esa campaña previa que nun llama a la resistencia sinón a l’acción, que son dos coses mui distintes, que nun cai en tópicos nacionaliegos como la historia heróica del pueblu asturianu, incidiendo muncho más nel futuru y centráu n’ufiertar propuestes sociales qu’ameyoren la vida de les asturianes y asturianos.

“Presta enforma ver cómo xente mozo s’organiza y trabaya alredor d’unes idees coles que coincido”

Presta enforma ver cómo xente mozo s’organiza y trabaya alredor d’unes idees coles que coincido y nes que llevo creyendo dende hai munchos años, abúltame que se necesita una plataforma qu’atrope a esi asturianismu de calter progresista, que dende la seriedá y los pies na tierra reflexone sobre lo que significa la soberanía nel sieglu XXI, qu’empape d’esta idea al restu de les fuercies polítiques que nel campu popular operen n’Asturies. Aína tán llamaos a nun ser namás otra de les munches tentatives -una sigla más- na murnia historia del asturianismu políticu; tienen tol derechu del mundu a intentalo, como otros lo fiximos enantes, pero siendo conscientes de la so responsabilidá y del estáu d’animu d’aquellos y aquelles que se consideren parte d’esa cultura política. De mano, los sos primeros pasos son esperanzadores, tienen voluntá y quiero creyer que tán abiertos a dialogar y llegar a alcuerdos con otres fuercies y sectores. Deséo-yos que seyan un actor fundamental na creación d’esi espaciu políticu asturianu y qu’exerzan de complementu d’otres estratexes posibles nesti momentu crucial, ensin arrenunciar a convertise nel polu hexemónicu de la izquierda alternativa d’esti país.

Semeya: David Aguilar Sánchez

Soi un soberanista convencíu, una colectividá humana como l’asturiana, pequeña territorial y demográficamente, o tien verdadera capacidá de decisión sobre los asuntos que-y afecten o ta condergada a la intrescendencia y la irrelevancia; necesitamos un poder asturianu col que protexenos y aseguremos el futuru del país, Asturies debería ser soberanista, sinón por convencimientu por necesidá. Poro, considero a Aína parte del mio posicionamientu ideolóxicu y van poder contar cola mio collaboración si asina la precisen. Dende’l soberanismu modernu, pero consciente de la sociedá asturiana real na que vivimos y tenemos que desenvolver la nuestra praxis política, felicito a les compañeres y compañeros d’Aína pol pasu dau y doi-yos la bienllegada.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí