Aína echa a andar. Dempués d’inscribise más de 170 persones y del Congresu Fundacional cellebráu’l 6 de payares, el nuevu partíu políticu asturianista y d’izquierdes constituyó esta selmana la so primer Agrupación Llocal.
Cola constitución d’esta agrupación llocal, Aína entama la campaña #AbrimosCamín, que contempla un calendariu d’alcuentros en más d’una decena de conceyos de toa Asturies colos que la formación quier activar les sos primeres organizaciones municipales. D’esti mou, el partíu busca consolidar l’afiliación de les persones inscrites, aportar a más xente y “entamar el so trabayu políticu dende la cercanía, pa dar respuesta a les necesidaes de parroquies, barrios y conceyos”.
El partíu tien ente los sos oxetivos “asturianizar la política; señalar y poner igua a les desigualdaes sociales n’Asturies; ufrir una alternativa pa qu’Asturies algame les mayores cuotes d’autogobiernu a nivel políticu, económicu, sociacultural y rexenerar la política asturina”.
