Nun hai un proyeutu de tresformación social. Lo qu’hai ye una pugna por ver quién roba delles migayines al estáu-de-coses-imperante. Seya l’oxetu una llei, una midida, un presupuestu.
Al nun haber proyeutu de tresformación les entidaes potencialmente tresformadores esllíense, ello ye que queden fragmentaes por discutinios tremendamente absurdos. Puestinos y perres. Meyora de la colocación na pirámide de la puxarra elleutoral.
¿Quién come finalmente los restos de la turrada que l’estáu-de-coses dexa enriba la mesa?
Nel ámbetu estatal: Tenemos nestos díes dos exemplos claros poco controvertíos: Per un llau la permisividá col loby de les constructores, quienes años de marafundiu y amañamientu de contratos nun suponen dengún tipu sanción. Siguen colos sos negocios como si na pasare.
Nel ámbetu internacional: La constatación del responsable del españíu y desaniciu del Nordstream2. Un ataque fechu por USA en suelu européu qu’amás lu coloca como principal esportador de gas, proveniente amás del frucking. Nun tiempu onde se fala de trensción enerxética y cambéu climáticu, vemos como los pasos lóxicos se ven destruyíos, les rellaciones internacionales dañaes con un Estáu de frontera como ye Rusia pa con Europa, debilitando dafechu la so posición y la so capacidá d’aición terminando por cayer nes manes, de nuevo, del Tío Sam. Cuando lo que tocaría cuantayá yera tener una política esterior y de defensa autónoma dientro d’Europa.
Porque fixáivos que si nun tenemos escrúpulos pa tener alcuerdos con rexímenes como’l de la propia USA, o con Rusia nel pasáu o con China pa lo que convién, o cola tarrecible Arabia Saudita o la Turquía d’Erdogán, ¿Por qué non rediseñar les nueses posiciones?
Porque a lo que vamos cola nuesa llamada democracia (neo)lliberal ye a un enfrentamientu bélicu d’algame imprevisible y probatiblemente forrible.
Tornando al ámbetu de lo cercano, ¿Esiste mayor torpeza que la que tán amosando “los nuesos partíos”? Porque nun hai naide que salve nesta situación de despropósitu acumulao.
Aquellos que s’enquisten nuna posición purista renegando de los sos potenciales aliaos. O aquellos que se creen cola sabiduría o la llexitimidá pa imponer -lo que seya-. O aquellos que na crítica al too porque “toos son iguales” nun faen por intentar llimar aspereces y proponer fórmules qu’axunte a Los y Les Naide, condergaes pola hestoria a continuar na so posición, na so situación de desmayu.
Aquellos cansaos de tanto bregar, nel so abandonu -y pesie a too-, terminarán viendo la fin de los díes que pudieron ser evitaos.
Y nun ye por ser apocalípticu pero yá mos val. ¿Cómo ye posible qu’ente semeyantes nun seyamos quien a maxinar un mundiu compartíu? ¿Y cómo mos prestaría que fueren eses rellaciones nesi mundiu previstu? Tamos enzarraos en marcos lóxicos ayenos a la nuesa realidá, preses de los rellatos y discursos. Ensin comunicación de base que permita un parapetu al discursu televisáu, mediatizáu.
Siguimos retolicando, gorgutando per redes impersonales nun espaciu irreal, mientres les decisiones se tomen nel mundiu físicu y haza’l mundiu físicu. El ciberespaciu ye un espeyismu nel que mos sentimos “llibres”, pero nun dexa de ser una película del nuesu subconsciente. Vemos un discursu airáu d’un youtuber, pa respuender en comentarios lo mal que tán les coses. Pero nun somos quien a organizanos tocándonos les manes.
Tenemos mieu al vecín d’enfrente porque igual ye un casposu, o un rojo pelligrosu, pero lo cierto ye que tien la mesma situación fundamentalmente y na mayoría los casos, que tu (si ye que ye’l to vecín).
Ponemos en riesgu trunfos -por mínimos que seyan- por infantilismos que yá meten mieu al pánicu. Y sí, ye infantil espatuxar na soledá y necesidá de diferenciase del compañeru/a. Envede remar xuntos p’algamar soluciones conxuntes qu’efeutivamente enfrente’l carroñerismu y la inxusticia caltenida nel tiempu pol estáu-de-coses-imperante. Llevantémonos d’una vez porque pensamos a comuña. Non porque xuntamos lletres y sigles. Non porque mos convién elleutoralmente nun momentu dau, sinón porque construyimos a xunteta un proyeutu común de sociedá, de país. Ye que tamos a fosties ente lo paupérrimo mientres los de
