Muyeres

Muyeres qu’escribieron munches de les meyores páxines de la Hestoria vertiendo’l sangre de les sos venes pa tratar de conquistar unes poques llinies de tinta que-yos acabaron negando en munchos casos. Muyeres a les que-yos robaron el nome, la valía y el talentu: l’autoría de los sos cuadros, de les sos escultures, de los sos descubrimientos, de les sos obres lliteraries (siempre había una firma masculina, real o inventada, dispuesta a suplantar la so identidá). Muyeres a les que-yos robaron dalgo tovía más valioso: el so derechu a pensar, a opinar, a suañar, a vivir…

Muyeres a les que torturaron y quemaron por bruxes, que yera poco menos qu’un ‘agravante’ de la so condición de muyer. Les nietes arguyoses de les bruxes que nun llograron quemar salieron ayeri n’aquelarre a les cais de Mieres y de Xixón, de Madrid y de Barcelona, de Roma y de Nueva York, de Buenos Aires y de Melbourne, colos sos glayíos afilaos, pa arrinca-yos l’alma a taragaños a los nietos de los inquisidores, que siguen equí con otru disfraz políticu.

Muyeres qu’asaltaron los cielos na Revolución del 34 n’Asturies: Aida Lafuente dignifica’l nome d’esta tierra. Muyeres que defendieron les barricaes delantre del fascismu na guerra civil, col golor a xusticia nel aliendu, l’aliendu d’igualdá nos llabios, los llabios cargaos de rabia y la rabia apretando los sos puños. Muyeres partisanes que fueron les primeres n’echase al monte o en salir a les cais en munches ciudaes italianas, fusil en mano, cuspiendo bales y glayíos de llibertá mientres diben barriendo de fascistes una Italia que, nin entós nin agora, se rinde delantre del fascismu.

Muyeres a les que siguimos conociendo pol apellíu del maríu, anque se trate d’una muyer que ganó dos premios Nobel, el de Física y el de Química (el so maríu ganó ún a medies, y gracies). Muyeres que siguen apaeciendo en lletres pequeñes nes cróniques de los viaxes espaciales, anque teamos falando de la muyer que batió’l récord de permanencia nel espaciu nos años sesenta: orbitó cuarenta y ocho veces alredor de la Tierra, sumando más tiempu nel espaciu que tolos astronautes estáunidenses xuntos (toos ellos varones, por supuestu), nuna cápsula tan pequeñuca y claustrofóbica que los propios soviéticos llamabénla La Llata de Sardines. Marie Skłodowska y Valentina Tereshkova son los sos nomes, que nunca y que nadie los escaeza.

Muyeres que salen de casa de madrugada con pasu acelerao, porque van fuxendo de la probitú que-yos pisa los calcaños, pa ganase’l salariu fregando un portal. Muyeres que vuelven a casa de madrugada con pasu acelerao, al volver del trabayu o de tomar una copa, porque va siguiéndoles dalgún cabrón p’arrinconales nun portal.

Muyeres que dibuxen con tol amor mariposes nos cuadernos de les sos fíes y fíos, y muyeres que pasen de la maternidá y dibuxen, col mesmu amor, mariposes nos corazones de la xente a la que quieren. Muyeres qu’amen a homes, muyeres qu’amen a otres muyeres, muyeres qu’amen a persones de xéneru non binariu, muyeres que nun amen a naide o muyeres qu’amen a quien-yos sal del coñu, porque d’eso va la llibertá: esi conceptu, esi ideal que ta ofensivu resultaba nel pasáu y que tan ofensivu sigue resultando nestos tiempos.

Muyeres a les que-yos arrincaron de los brazos, nel nome de la moral, del nacionalcatolicismu o de cualesquier otra mierda, la criatura nacida nes sos coraes pa regalala a una familia ‘de bien’ o a un orfanatu. Y muyeres criminalizaes y obligaes a exercer en condiciones abegoses y mui doloroses el so derechu a nun tener la criatura que llevaben nes coraes.

Muyeres qu’encabecen sindicatos, empreses, negocios, plataformes, asociaciones, medios de comunicación, cargos públicos… Muyeres qu’en munchos casos tienen que dexar el pelleyu pa demostrar que son aptes, porque xulguen el so llabor non solo pola so valía, sinón tamién pol fechu de que son muyeres.

Muyeres a les qu’esploten sexualmente y muyeres a les que siguen imponiendo la clandestinidá y el silenciu, la humillación y l’atropellu. Muyeres que nun tienen derechu a enseñar el so pelu o’l so rostru, muyeres que tienen prohibío dir a la universidá por ser muyeres.

Muyeres que planten cara, con un par de ovarios, al so maltratador y muyeres que nun pueden facelo por mieu, inseguridá, falta de recursos personales o d’apoyu social; porque nun somos quien a texer baxo elles una rede de seguridá sostenida poles nueses manes pa dici-yos: “¡Salta, compañera, que nosotres y nosotros te garramos!”.

Muyeres que yá nun tán porque les esterminaron, porque les siguen esterminando, día a día, a cuentagotes (a guelpes, a puñalaes, a tiros…), nesta sociedá primermundista que fracasa con cada asesinatu d’una muyer. No que va d’esti añu, eses muyeres que nos falten llamábense Belén, Eva, Hayate, Natalia, Paloma, Caterina, Beatriz, Elia…

Muyeres que lluchen, que combaten, que resisten, qu’aguanten, que desafíen, que griten, qu’aúllen, que baillen, que se rebelen, que se caguen en tolos muertos del putu patriarcáu. Muyeres que son dueñes de sí mesmes.

Muyeres imprescindibles toes elles.