El Diccionariu de l’Academia de la Llingua Asturiana define la espresión ‘al debalu’ como daqué movíu poles foles o pol aire ensin nengún control. ‘Al Debalu’ ye tamién la novedá más recién de la cervecera Cotoya (Llugones, Siero), que presentaráse esti sábadu, 25 de marzu, en Santa Pau (La Garrotxa, Girona), nel marcu de la Fiesta de la Formentadura Espontánea y Selvaxe ‘Rustic & Wild’.
‘Al Debalu’ de Cotoya sedrá la única cerveza asturiano de les presentes nel festival. Formentó al debalu a lo llargu trés años, dexándose llevar namás pol lleldu del mediu. Esti procesu centenariu, al qu’antecede lo que se conoz nel mundu cerveceru como turbid mash, ye similar al emplegáu nes cerveces del valle del Senne, na rexón belga de Pajottenland. Según los sos creadores “el resultáu ye una cerveza ácido, arriquecío pola complexidá de los sos formientos selvaxes y pa beber ensin priesa, cola mesma cadencia cola que se ximielga, sobre les foles d’una mar na letía, el barcu d’Odilon Redon qu’ilustra la so etiqueta”.
‘Al Debalu’ asoleyaráse nes cerveceríes asturianes na última selmana de marzu, tres la so presentación en La Garrotxa.
