Quiero sentir nel Parlamentu asturianu la voz de Xune Elipe, al que nunca-y tremó la voz

Soi una de les persones firmantes del manifiestu d’apoyu al músicu y productor, al que la dirección estatal de Podemos y los sos cónsules provincianos nun quieren como diputáu na Xunta Xeneral

Recomendados

Paco Álvarez
Paco Álvarez
Periodista, escritor y traductor lliterariu d'italianu. Ye autor de les noveles "Lluvia d'agostu" (Hoja de Lata, 2016) y "Los xardinos de la lluna" (Trabe, 2020), coles que ganó en dos ocasiones el Premiu Xosefa Xovellanos.

Conozo dende va cuasi trenta años a Xune Elipe. Siento hacia él ciñu, respetu, almiración y agradecimientu; polo que fizo, polo que representa, polo que ye como persona. Una de les coses más cencielles y más fondes que puedo dicir de Xune ye que nunca-y tremó la voz en nengún escenariu. Nunca-y tremó la voz nos escenarios, nos estudios de grabación, nes ruedes de prensa, nos mitinos, nos despachos, na vida… Conozo a Xune lo necesario pa saber que tampoco-y va tremar la voz agora que quier busca-y les cosquielles la dirección estatal de Podemos (el primu de Zumosol al que pidió ayuda la sucursalista dirección asturiana del partíu), qu’acaba d’abri-y un espediente, a traviés d’un comité ‘disciplinariu’ con un nome que ye pa mexate de risa, col envís de quitalu d’en mediu como númberu dos de la candidatura de Podemos Asturies al Parlamentu asturianu.

Xune ganó esi puestu de salida pa les elecciones de mayu como candidatu más votáu nunes primaries nes que, por poner un exemplu, Rafael Palacios, diputáu y voceru parllamentariu (designáu a deu polo poco que queda de dirección asturiana, polo muncho que queda de sucursal de la dirección estatal), acabó en sesta posición. Palacios dempués quedó solu, nun grupu parllamentariu de tres diputaos y una diputada, pidiendo l’acta (la cabeza clavada nuna pica, más bien) d’un compañeru de bancada y anteayeri, pa rematalo, perdió les primaries pa dir de cabeza de llista en Llangréu (acabó siendo cabeza nuna pica). El mentáu dirixente, que yá ta más solu que la una, dexó claro que nun piensa dimitir. Prietas las filas, recias, marciales, dicía un cantar siniestru que nun aguanta la comparación con nengún de los cantares de Dixebra qu’entona un tipu como Xune, al que nunca-y tremó la voz.

Pa mio idea que me toi faciendo vieyu, porque siento señaldá d’aquellos tiempos nos qu’había representantes políticos, lo mesmo a la izquierda qu’a la derecha, que cuando se pegaben una hostia descomanada nes urnes o en procesos d’elección internos arrebañaben la poca o la mucha ética y decencia que-yos quedaba pa echase a un llau, pa nun siguir envelenando los pozos nos que bebe’l so electoráu. Nestos otros tiempos, al paecer, lo que se lleva ye garrase a la poltrona anque la to militancia te suelte dos o tres gofetaes ruidoses, anque vayas de nacionalista asturianu y tengas qu’atechate tres de los carros de combate d’una dirección estatal xacobina, centralista, putinista, que ta entrando n’Asturies a sacu (hai que tener estómagu pa dir d’independentista asturianu y combayar con esos).

Nun soi tan cruel de poneme a comparar lo que ficieron por esta llingua y por esti país el númberu dos y el númberu seis de la candidatura…

Xune Elipe, cantante de Dixebra y responsable de Goxe Producciones.

A Xune nunca-y tremó la voz; a mi sí, munches veces. Una d’elles foi cuando lu conocí. Yo daquella llevaba malpenes un par d’años trabayando como redactor nel periódicu El Comercio, pero llevaba yá una montonera de conciertos de Dixebra, nos qu’acababa dando botes y glayando l’estribillu puños n’altu colos mios collacios. A aquella Asturies cola que suañábemos, aquella Asturies pola que nagüábemos, poníén-y una música poderosa los instrumentistes de Dixebra, ponién-y lletra solemne escritores como Xandru Fernández o Quique Faes; ponía-y voz Xune, que, como escribió’l periodista Pepe Colubi, nuna crítica d’ún d’aquellos munchos conciertos, “baillaba sobre l’escenariu cola verticalidá inquebrantable d’un guerreru zulú”. Tremóme la voz (de xuru qu’él nun s’acuerda) cuando-y fici la primer entrevista, porque pa mi Xune yera daquella una lleenda. Yá nun ye pa mi una lleenda, ye dalgo más cercano y más querío: un compañeru.

Tuvi la suerte de sintonizar a lo llargo de toos estos años con él y cola banda: compartí con ellos díes de grabación nel estudiu del vascu Kaki Arkarazo, el testu d’un discu-llibru, otru llibru dedicáu a les lletres de Dixebra, la lletra de dalgún cantar pa Dixebra, pa Soncai Sound y pal Colectivu de Músicos pola Oficialidá. Too eso débo-y a Xune.

Non soi quien a imaxinar el movimientu de reivindicación llingüística nin les milenta lluches, asturianistes y internacionalistes, que llibramos nesti país llamáu Asturies ensin la voz de Xune, nin tan siquiera ensin tolos proyectos que vien entamando o nos que vien participando Xune en toos estos años.

Laura Tuero, Xune Elipe, Covadonga Tomé, Natalia Alonso, Roca Suárez y Luis Ahija, en un encuentro en Xixón entre la candidatura de Podemos Asturies y representantes de EscenAsturias. Foto: Luis Sevilla

Soi ún de les más de sesenta persones del asturianusmu cultural, social y políticu firmantes d’un manifiestu d’apoyu al candidatu Xune Elipe. De xuru que nengún otru mediu de comunicación va publicar el llistáu completu, asina qu’equí va: Lurdes Álvarez, Xuacu Amieva, Xosé Ambás, Taresa Lorences, Lisardo Lombardía, David Rivas, Cheni Uría, Lluis Nel Estrada, Rubén Vega, Ignaciu Llope, Fernando Rubio, Primi Abella, Xicu Ariza, Xandru Fernández, Damián Barreiro, Miguel Fernandi Burilo, Xandru Martino, María Xosé Rodríguez, Alberto Álvarez Peña, Iván Huerga Antuña, Silvia Cosío, Ernesto Avelino Suárez, Faustino Zapico, Gerardo Gutiérrez Romano, Nieves González, Antón Caamaño, Adolfo Camilo Díaz, Francisco Álvarez, Xuacu de Oyos, Consuelo Ríu, Xelu Gutiérrez Morán, Roberto González-Quevedo, Daniel García de la Cuesta, Llorián García Flórez, Tina Cuadriello, Susana Sela, Enar Areces, José Manuel Tejedor, Alfredo González, David Castañón, Fernando Ornosa, Octavio Trapiella, Silvia Quesada, Humber Sierra, Aitor García Corte, Vicente García Oliva, Daniel Cueli, Xosé María García Llábana, Javier Tejedor, Xuan Fernández Castañón, Rosario Fernández-Fuentes, Ramón Blanco, Francisco Javier García Valledor, David Artime Coto, Xaime Martínez, Miguel Solís Santos, Loreto Suárez, Xulio Casado, Lluis Antón González, Antón Barquero, Carlos Lastra.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí

https://www.nortes.me/wp-content/uploads/2023/03/300x486.gif