El presidente de l’Academia de la Llingua Asturiana, Xosé Antón González Riaño, pidió esti vienres un «consensu políticu ampliu» p’abordar la reforma del Estatutu d’Autonomía, que contemple la oficialidá del asturianu, na próxima llexislatura.
Manifestólo asina demientres l’actu central del Día de les Lletres Asturianes, nel que la poeta Lourdes Álvarez recibió’l III Premiu Nacional de Lliteratura Asturiana y David Guardado ingresó como nuevu académicu de númberu.
Na so intervención, González aseguró que ye «inaceptable» en términos «sociales y democráticos» qu’Asturies siga con una «escepcionalidá constitucional de non oficialidá», depués de que l’añu pasáu se «perdiere la meyor opción histórica» de que la llingua asturiana tuviere reconocimientu oficial.
«Ye preciso reconocelo p’aprender de los errores y pa que la falta d’arrogancia, de sentíu políticu y de compromisu con Asturies nun vuelva a repetise”, aseguró nun actu al qu’asistió’l presidente del Principáu, Adrián Barbón.
Asina, aseguró que, depués de les elecciones autonómiques de mayu, el Principáu d’Asturies tien una «oportunidá nueva», depués de que l’añu pasáu, tres de cinco meses de conversaciones ente PSOE, Podemos, IX y Foro, el Gobiernu socialista suspendiere la negociación y aparcare la reforma del Estatutu d’Autonomía hasta la próxima llexislatura a la espera de que’l resultáu de los comicios configure un parllamentu nel que más de tres quintes partes de los diputaos tean a favor de la oficialidá.
