SUATEA denuncia la precariedá llaboral del profesoráu d’asturianu y gallegu-asturianu

El sindicatu SUATEA reclama una meyora nes condiciones de trabayu del profesoráu de les asignatures de llingua asturiana y gallego-asturiana

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

Nun comunicáu difundíu esta mañana, el sindicatu SUATEA (Sindicato Unitariu y Autónomu de Trabayadores de la Enseñanza d’Asturies) critica la situación que carecen los profesores de les asignatures de llingua asturiana y gallego-asturiana. Acordies con SUATEA, «ente primaria y secundaria’l 70% del profesoráu d’asturianu trabaya a media xornada», mentes que nel casu del gallego asturianu los datos son tovía peores: cerca d’un 80% trabaya a media xornada.

Esta situación, según el sindicatu, arreya consecuencies mesmo pa la calidá de la educación que pa les condiciones llaborales del profesoráu: «los docentes tán condergaos tolos branos a ver si van tener trabayu y ónde, y los escolinos a saber si van tener escuela d’asturianu y cuándo». 

La inestabilidá y precariedá llaboral que conlleva l’asignatura fai que munchos docentes de les llingües propies d’Asturies acaben marchando pa otres materies y que, en consecuencia, falten profesores en dellos centros. Esti ye’l casu de los institutos d’Educación Secundaria de Cangas y Lluanco, que lleven «esperando que se cubran les baxes meses ensin que la Conseyería dea nenguna solución».

La solución pasa per una vieya reclamación de los sindicatos educativos y del movimientu de reivindicación llingüística: la creación d’una especialidá docente qu’acabe col agraviu comparativu que carez el profesoráu y l’alumnáu d’asturianu y gallegu-asturianu. Dende 2005, instituciones como la Xunta Xeneral del Principáu d’Asturies y la Conseyería d’Educación del Principado de Asturias tienen pidío recurrentemente al Gobiernu la creación de la especialidá, yá qu’esta decisión ha tomase a nivel estatal: la capacidá llegal pa creala pasa per un cambiu de los Reales Decretos d’Especialidá.

La Comisión d’Educación y Formación Profesional del Congresu de los Diputaos aprobó yá n’ochobre de 2021 una proposición non de llei del Grupu Parlamentariu Confederal d’Unidas Podemos-En Comú Podem-Galicia en Común, pola que s’instó al Gobiernu del estáu a reconocer y crear la especialidá docente de llingua asturiana y lliteratura, asina como de gallegu-asturianu.

Sicasí, too paez indicar que’l cursu 2023-2024 va entamar, cuasi dos años depués de la aprobación de la proposición non de llei, na mesma situación de precariedá de los cursos anteriores. Mentanto esta sitación s’arregle y non, SUATEA conmina a la Conseyería d’Educación a «convertir n’enteres la mayoría de les medies xornaes que se tán ufiertando».

Actualidad