La Real Academia de la Llingua Vasca, Euskaltzaindia, ve con “bonos güeyos” la constitución de la macrorrexón atlántica plantegada pol lehendakari y los presidentes de Cantabria, Asturies y Galicia, y atalanta que puede ser una oportunidá pa “fortalecer” les llingües minorizaes.
Nuna nota de prensa opinó qu’esa propuesta nun xenera namás una oportunidá nel ámbitu de la movilidá y la transición enerxética, sinón que sirve tamién pa visibilizar y revitalizar les comunidaes llingüístiques minorizaes que conviven nel arcu atlánticu.
Poro, Euskaltzaindia va solicitar al lehendakari que tamién se tengan en cuenta toles llingües y cultures minorizaes d’esta estaya a la hora d’establecer les funciones de la macrorrexón atlántica.
Amás, diz que ta dispuesta a organizase en rede xunta la Real Academia Galega, l’Academia de la Llingua Asturiana, Lo Congrès permanent de la lenga occitana, Ofis Publik ar Brezhoneg y otres entidaes afines pa dar visibilidá a les comunidaes llingüístiques minoritaries nes instituciones europees, reforciar la collaboración ente les mesmes, compartir proyectos, y tresferir el conocimientu acumuláu, principalmente, pente medies del usu de les tecnoloxíes nueves.
