Ye la primer vez que Llucía Miravalles fai un crowdfunding. Nun dexa tener un pocu vértigu por si nun saliera. De fechu diz que tenía “otru más gordu” preparáu, pero prefirió dir pelo seguro. Asina qu’agora mesmo puedes sofitala na plataforma Goteo.org pa remozar la páxina web (“la que tengo yá tien dalgunos añinos y estes coses caduquen”) y facese con un nuevu packaging de diseñu made in Asturies, d’esi que nagües por enseñalu.
Un mes (hasta’l 25 de xunu) ta abiertu esti proyectu pa apurri-y perruques que, una vez que superen esi óptimu de 6.000 euros, dirán destinaes a otros proyectos que Llucía tien na recámara. “Quixi dir a una sola ronda de 40 díes, pero ta yendo bien con esta llocura de selmana. Yo nun tengo eses perres, asina que me vien mui bien”.
Ye tiempu de remozar esa páxina web dempués de que zarrara la tienda física en pasando malapenes un añu d’abrila. “Nun funcionó, y anque la tenía abierta, la xente taba avezao a la compra online, polo menos conmigo. Zarré porque yera un gastu absurdu: l’alquiler… perdía perres. Amás a min dame más llibertá la venta online porque nun s’adaptaba a les mios necesidaes l’horariu comercial”, desplica.
Ye’l momentu de facer “dalgo nuevo, distinto”. Diz qu’había que probar porque na Villa hai pocos llocales comerciales, carísimos, y había que se tirar primero de que lu alquilaran. “Garrélu, tiré y probé. Igual nun yera’l momentu y nun pueo tar en tolos llaos: o en taller o na tienda. Fici númberos y víase que la tienda física nun funcionaba. Y nada, vuelta pa casa y yá ta. Hai que probar. Cuando conté que zarraba la xente que qué pena… pues non, los negocios son asina, hailos que salen bien y otros salen mal, nun pasa nada, tamos a tiempu de recular siempre. Yo tardé en facer esos númberos porque nun quería ver lo que taba pasando, y vas allargando… En realidá sabía lo que taba pasando y mentalicéme. Nun ye un fracasu porque Ringo Rango sigue funcionando”.
Nel so casu l’online “permíteme otros horarios y una xestión del tiempu muncho más llibre y pa min más beneficiosa porque yo en realidá atiendo mil coses: atiendo’l teléfonu, mensaxes de whatsapp, redes, emails, coso, diseño, facer les factures… si encima m’amarro a un horariu comercial, mal”.
La segunda pata d’esti proyectu ye’l packaging personalizao. “Voi trabayar con una diseñadora que se dedica especialmente al packaging de productos qu’amás ta equí en Villaviciosa, Gustostudio, que trabaya pa tol mundu. Toi emocionada pa que cuando te llegue’l pidíu a casa seya dalgo esclusivo de Ringo Rango. Y la páxina web voi facela con Melodijopérez”.
“Yá llevo unos cuantos años cola marca y paezme que ye importante cambiar, que te llegue guapo a casa pa que la xente cuando lo reciba quiera subir una foto de lo qu’acaba de recibir, que lo que te llegue seya tan guapo que teas deseando enseñalo y al final eso a min valme muncho pa siguir medrando, que la xente lo comparta pa llegar a más público. Tamién ye por da-y un aspectu un poco más profesional, imaxe de marca ye lo que voi facer. Non namás l’envoltoriu, sinón que vamos facer etiquetes nueves y pa productos concretos, como pa los cuellos d’iviernu, pa les mochiles, porque eso téngolo a la venta en más sitios físicos y entós quiero que vaya un poco más elaborao too”. Añade que “la mio obsesión ye llegar a más tiendes, pero nun ye lo mesmo que te lo venda o te lo envíe yo, que yá lo envuelvo yo, a que lo merques nuna tienda, que ye más importante la presentación pal que nun conoz la marca”.
Ringo Rango ye l’apueste pol pueblu: “eso ye l’adn de Ringo Rango. Soi una muyer rural que vivo nun pueblu pero nun me dedico nin a la ganadería nin a la alimentación porque güei en día pués dedicate a lo que quieras, y yo soi diseñadora de moda rural. Si queremos dar un futuru a los pueblos hai que diversificar l’actividá y si pueo servir d’exemplu a dalgún pa que s’anime, pa que dende’l pueblu s’anime a facer lo que quiera, pues ehí toi”.
Reconoz que tar cerca de la Villa da-y otres ventayes, “pero hai munches coses de les que yo tiro con servicios que puedes tener sin problema. Los envíos fágolos con Correos porque ye semipública y porque da un serviciu impecable a les zones rurales. Pasa tolos díes y el carteru recueye los paquetes de Ringo Rango pa envialos. Pero con otres empreses de mensaxería, y mira que toi cerca de la Villa, que me lo dexen na gasolinera… y déxenme los rollos de tela per ehí… pues non, chico, páguente pa que lo traigas equí. Nun me presta que m’anden dexando los rollos de tela per ehí abandonaos. Y yo tamién veo les condiciones nes que trabayen… y el futuru ye esi, comprar online, pero les condiciones de los trabayadores paécenme importantes. Dende’l principiu lo expliqué: comprar online, en sí, nun ye malo, lo que ties que facer ye escoyer ónde compres. Nun ye lo mesmo comprame a min que comprar a Amazon. Yo considérome comerciu llocal anque nun tenga establecimientu físicu. Y cada vez hai más negocios pequiñinos vendiendo online, ye una ventana que permite l’asentamientu y mantenimientu de población nes zones rurales”.
Destaca ente les recompenses la romería, de la que diz que-y fai “muncha ilusión y voi dar la turra pa que lo pillen. Va ser na Benéfica, que yá falara yo con Rodri (Rodrigo Cuevas) nel so día, y van ayudame a organizala les moces de Mecayeso, que faen unos eventos mui guapos. Quiero que seya como la fiesta les Ladys, como la gala MET pero nel rural asturiano. Cola intención de si sal bien, repetila una vegada al añu con un fin benéficu, onde relacionar la moda, lo rural con una fiesta. Y una manera de reforzar lo que ye La Benéfica nel territoriu”. Otres recompenses son les camisetes, de les que va facer una última tirada pa retirales, al menos hasta qu’atope una alternativa en textil fecho n’España.
Ta claro que’l rural asturiano gasta munchu Ringo Rango.
