A finales de los años 70 l’asociación socio-cultural Conceyu Bable desempolvaba de la hemeroteca histórica una fecha de la que yá naide s’alcordaba: el 25 de mayu de 1808. Alredor d’ella entamaba varies actividaes, d’ente les que rescamplaba la ufrienda floral na Sala Capitular de la Catedral d’Uviéu; hasta ellí díbemos militantes y simpatizantes del nuevu asturianismu -qu’escomenzaba a dar los sos primeros pasos- a dexar una corona de lloréu y reivindicar aquella fecha como xornada na que celebrar el Día d’Asturies. Y ye que lo que representa’l 25Mayu ye, nin más nin menos, que la entrada del nuestru país na modernidá histórica; cuando’l pueblu asturianu, al traviés de los sos representantes na Xunta Xeneral, constitúise en protagonista del so devenir, garra les riendes del so destín, autoorganízase como un estáu, declara la soberanía y preséntase ante’l mundu.
Naquel tiempu yéremos namás unos cientos de persones les que, conscientes de lo que significaba, facíemos alcordanza y festexábemos el 25Mayu. Asina foi a lo llargo de munchu tiempu, con unos políticos y unes instituciones asturianes ayenes dafechu a tolo que significara identidá y conciencia de país, hasta’l puntu d’escaecer la fecha na constitución d’Asturies como comunidá autónoma. Un procesu ésti nel que’l pueblu asturianu foi un simple espectador, al que nun se dexó participar directamente, otorgándonos un Estatutu d’Autonomía mui rebaxáu y condicionáu por unes fuercies polítiques centralistes a más nun poder. Andando’l tiempu aquella reivindicación del 25Mayu foi popularizándose y convirtiéndose nun elementu a reconocer del ser colectivu d’asturianos y asturianes. Anguaño, el Gobiernu Asturianu recuerda esta data y conmemora nella’l Día de la Bandera con actos institucionales, lo que supón un éxitu del asturianismu, que foi quien a insistir na so recuperación. Bien ye verdá qu’esta tímida alcordanza céntrase na creación de la nuestra enseña nacional -lo que nun ye poco-, sicasí, habría que dotala tamién de conteníu políticu.
A cuarenta años de l’aprobación del Estatutu d’Autonomía, al qu’accedimos pela llamada vía lenta (Art. 143 de la Constitución) vemos cómo aquel testu curtiu y medrosu del autogobiernu quedó desfasáu dafechu, nun sirviendo anguaño a los intereses d’una sociedá asturiana que poco tien que ver cola d’aquel tiempu. Poro, les elecciones autonómiques del próximu domingu van ser cruciales pal llogru d’una más que necesaria reforma de la máxima norma llegal asturiana. Un remocique estatutariu qu’articule y vertebre’l país, con un poder asturianu real y efectivu, nel que controlemos los nuestros recursos, con un nivel y calidá competencial amañosu y adecuáu a les nuestres característiques. Amás, tien que complementase con otra visión d’Asturies, non subsidiaria, na qu’ésta seya un fin en sí mesma, un marcu específicu que favoreza una rellación más averada cola ciudadanía. Los representantes políticos que salgan de les urnes habríen ser conscientes de la importancia d’esta reforma estatutaria y ponese a trabayar nella dende’l primer momentu.
Asturies necesita dir creando un verdaderu poder propiu; sociedaes tan pequeñes como la nuestra requieren d’unes instituciones con capacidá de decisión real si nagüen por sobrevivir como comunidaes humanes diferenciaes. Hemos empezar a falar, ensin mieu, de soberanía en tolos sentíos (alimentaria, enerxética, cultural, comunicativa…), facer nuestru esi conceptu mesmo como los asturianos y asturianes lo fixeron suyu en 1808. Pongamos en marcha l’axenda asturiana global, qu’encare, reflexone y proponga soluciones y alternatives a los problemes que padecemos: avieyamientu poblacional, perda demográfica, vertebración territorial, industria, comunicaciones, oficialidá… Asturianicemos la política, faigamos país.
