Izquierda Asturiana celebra la so integración en Sumar

Nun comunicáu emitíu de recién, Izquierda Asturiana llama a la unidá y a formar un frente escontra la ultraderecha

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

El partíu republicanu y asturianista Izquierda Asturiana ta acabante d’emitir un comunicáu nel que «saluda’l proyectu de SUMAR integrándose al llau d’otres fuercies polítiques soberanistes del estáu».
 
Según el testu d’IAS, que se tien presentao en dellos de los últimos comicios en coalición con Izquierda Xunida y dientro de marques como Unidad Popular, Unidos Podemos o Convocatoria por Asturies, la formación «celebra l’esperáu fin de les negociaciones» y fai «un llamáu a la ciudadanía en pos de la participación masiva nes elecciones xenerales del 23X col oxetivu compartíu y urxente de parar les fuercies de la ultraderecha».
 
Diverxendo daqué de la estratexa de Yolanda Díaz, que nel actu del sábadu pasáu nel que celebraba la coalición declaraba que «Sumar nun vieno a ximelgar el mieu o la llercia» sinón a «ganar les elecciones xenerales», Izquierda Asturiana pon l’acentu na amenaza de la perda de derechos y del futuru compartíu pola «segunda instauración ultrarreaccionaria nel estáu español, aupada polos demiurgos del estáu fondu y llevada arrecostines pola clase empresarial nacionalista española y los medios de comunicación de la dómina de la post-verdad».

A lo último, Izquierda Asturiana fai una llamada a la unidá de la izquierda pa formar un frente común —«nin Asturies nin el soberanismu asturianu pueden quedar fuera del tren de la historia»— y reivindica l’éxitu de Convocatoria por Asturies nes últimes elecciones, namás comparable col d’otres fuercies d’izquierda como EH-Bildu y el BNG, lo qu’habría dar fuercies p’algamar «polítiques asturianes tresformadores que vuelvan la nuesa patria querida al llugar que merez ente los pueblos del mundu».

Cola ayuda del Gobiernu del Principáu d'Asturies.

 

Actualidad