El grupu formáu por Leticia Baselgas y Rubén Bada, que se dio a conocer col discu Post-folk-asturianu (2018), ta acabante de llanzar el tercer single del que va ser el so próximu álbum: «Menodito».
Esti tema p’acompañar el baille de la patada, una especie de xota, recuéyelu L-R de la tradición oral asturiana, y particularmente de la versión que d’él fixo Honorina Riesgo, una muyer vaquera, y que grabó’l conocíu etnomusicólogu americanu Alan Lomax en Modreiros (Miranda) en payares de 1952, demientres el so viaxe per delles rexones de la Península.
Nel cantar que vien d’asoleyar L-R collabora’l dúu de La Alcarria Hermanos Cubero, que cola so guitarra y mandolina tien propuesto dalgunes de les revisiones más interesantes de la música castellana dende’l puntu de vista del bluegrass americanu. En «Menodito», asina, podemos sentir la mandolina de Roberto Cubero y la voz del so hermanu Enrique, qu’aporten el so soníu peculiar y coherente al cantar d’Honorina Riesgo.
La xota vien acompañada d’un videoclip dirixíu y producíu polos mesmos Rubén Bada y Leticia Baselgas, onde podemos ver a los componentes de L-R danciando y interpretando esta música pal baille na nueche, énte unos focos y en metá del monte, nuna escena qu’alcuerda a delles secuencies de David Lynch.
