Acordies col partíu Andecha Astur, el vetu a la música asturiana que formuló hai unos díes la conceyala de Vox en Xixón, Sara Álvarez Rouco, constituyiría un delitu d’odiu. En consecuencia, Andecha Astur ta acabante d’interponer na Fiscalía Superior d’Asturies una denuncia contra la conceyala de festexos.
Sara Álvarez Rouco dio’l 23 de xunu una entrevista nel programa «Más d’ún», que dirixe Guillermo Figueroa n’Onda Cero, onde dixo que «si se puede», nun va contratar pa les fiestes de branu de la ciudá a los artistes que canten o s’espresen n’asturianu, lo que p’Andecha Astur sedría una comisión de delitu d’odiu con agravantes d‘alevosía, prevalencia de cargu públicu y reincidencia.
El partíu considera que la «voluntá manifiesta de discriminar a una parte la población por motivu de llingua ye ún de los casos ñidiamente tipificaos comu delitu d’odiu nel artículu 510 del Códigu Penal y na Circular de la Fiscalía Xeneral del Estáu sobro interpretación de los delitos d’odiu, siendo posible castigar esti delitu con penes de prisión d’un a cuatru años, amás de multes».
Amás, esti actu, acordies con Andecha Astur, nun contravendría namás la Constitución, sinón otres lleis y protocolos como l’Estatutu d’Autonomía p’Asturies, la Llei d’Usu y Normalización del Asturianu, la Declaración Universal de los Derechos Homanos, el Protocolu nu 12 del Conveniu Européu pa la Proteición de los Derechos Homanos y de les Llibertaes Fundamentales, y la Carta de los Derechos Fundamentales de la Xunión Europea y la Recomendación de Política Xeneral nu 15 de la Comisión Europea escontra’l Racismu y la Intolerancia.
A lo último, Andecha Astur pide a los demás partíos asturianos d’izquierdes que «valoren la urxencia» d’organizar un frente común pa parar los pies a la ultraderecha nes instituciones.
