El próximu sábadu 19 d’agostu va tener llugar na Feria Internacional de Muestres d’Asturies (FIDMA) el segundu Día de la Llingua Asturiana. A lo llargo del día va desenrollase un programa con más d’una docena d’actividaes coordinaes pola asociación Iniciativa pol Asturianu, en collaboración cola Cámara de Comerciu de Xixón.
El programa d’actos va entamar a meudía cola recepción del presidente d’Iniciativa pol Asturianu, Iván Llera, a representantes del Gobiernu asturianu, instituciones, alcaldes y conceyales de tola comunidá. Darréu, va tener llugar el pregón popular a cargu de Xosé Manuel Fernández y el pregón reivindicativu a cargu de l’actriz Nerea Vázquez. L’actu va continuar con un homenaxe a la figura de Gaspar Melchor de Xovellanos, que cuenta con un bustu nel recinto ferial Luis Adaro.
Nes hores siguientes, van tener llugar actividaes n’asturianu n’escenarios estremaos de la FIDMA: dende’l propiu puestu d’Iniciativa pol Asturianu (pabellón 3), onde a les 13:00 se van presentar les catorce empreses que participen nel espaciu de la entidá y a les 13:30 hores van poder tastiase los productos de Cerveza Cotoya; a los puestos de dellos conceyos, como’l de Llanera, que va entamar un cuentacuentos n’asturianu pa la reciella con Sergio Buelga de magar les 18:00.
Les actividaes son tamién de toa mena: dende presentaciones de llibros —La vieya, d’Aique Fernandi (Radagast) y la traducción de la novela Kim, de Ruyard Kipling (Trabe), nel puestu nel stand de Iniciativa; y la revista de lliteratura Formientu, nel de La Nueva España— hasta talleres de pandereta y baille tradicional (Conceyos con encanto), un tastiu de sidra (Conceyu de Mieres) y repartu de materiales estremaos n’asturianu.
