Acordies con una nota de prensa que ta acabante de difundir la organización de defensa de los derechos de los asturfalantes Iniciativa pol Asturianu, el Centru d’Educación p’Adultos de Xixón (CEPA) taría discriminando a los alumnos que quieren estudiar asturianu nel centru.
Asina, como puede vese na semeya qu’acompaña a la nota, el formulariu de matriculación de les distintes asignatures o módulos del segundu nivel recueye que, nel casu del módulu d’asturianu, la matriculación tará «condicionada al númberu de solicitantes y al nomamientu del profesor». Iniciativa pol Asturianu apunta qu’esto nun ocurre con nengún otru módulu formativu de la escuela pa la formación d’adultos nin con otros centros.
L’asociación recibió la quexa de delles persones que se decataren d’esta puntualización nel formulariu d’inscripción. Esta discriminación al módulu de Llingua y Lliteratura Asturiana nel centru xixonés atenta contra la Llei d’Usu y Promoción del Bable/Asturianu. Tal y como recueye esta normativa nel so artículu 10 «nel exerciciu de les sos competencies, el Principáu d’Asturies va garantizar la enseñanza del bable/asturianu en tolos niveles y graos, respetando non obstante, la voluntariedá del so deprendizaxe». En tou casu, el bable/asturianu va tener que ser impartíu dientro del horario escolar y va ser consideráu como materia integrante del currículu. Un derechu que se fai estensivu a la educación permanente d’adultos nel puntu 2 del citáu artículu.
A lo último, Iniciativa pol Asturianu aprovecha p’alcordar al alumnáu y a los centros educativos que nun hai sistema de ratio mínimu d’alumnos matriculaos pa poner clases d’asturianu en nengún nivel o estaya educativa. Según s’apunta dende la organización, esta esixencia foi declarada illegal pola sentencia confirmatoria de la Sala de lo Contencioso-Alministrativo, Estaya Cuarta, del Tribunal Supremu, con fecha 24 d’abril del 2012.
